RTK do të ndërpresë rreth 140 nga 239 kontratat mbi vepër, do të shpallë konkurs për 98 pozita

Ndonëse ishte kritikuar për “mbipopullim” me punëtorë, Radiotelevizioni i Kosovës në projeksionin buxhetor për vitin 2022 ka parashikuar rekrutimin e 98 punëtorëve.

Por, siç ka shpjeguar ushtruesi i detyrës i drejtorit të përgjithshëm të televizionit publik, Shkumbin Ahmetxhekaj, paraprakisht do të hiqen 60 për qind e 239 të punësuarve me kontrata për shërbime. E shprehur në numra, nga 239 në më pak se 100, apo rreth 140 të punësuar më pak.

Në projeksionin buxhetor për 98 punëtorët që parashihet të rekrutohen janë paraparë 536 mijë e 631 euro.

Ky projeksion, i cili është  miratuar në bordin e RTK-së, ka paraparë që të ketë të hyra 10 milionë e 537 mijë euro. Nga to 8 milionë e 960 mijë euro të ndara nga buxheti i Kosovës.

Në projeksion-buxhetin e RTK-së thuhet se 8 milionë e 854 mijë euro do të shkojnë për paga, kontrata kolektive, mëditje, kontributet dhe tatime.

2 milionë e 240 mijë euro më pak i ka ndarë Qeveria e Kosovës RTK-së për vitin 2022.

RTK-ja për vitin 2021 kishte pasur 11.2 milionë euro buxhet për të shpenzuar.

Më 19 janar bordi i RTK-së kishte shkarkuar drejtorin gjeneral, Ngadhnjim Kastrati. Në arsyetimin e vendimit për shkarkim thuhet se Kastrati kishte dështuar për tre vite rresht të hapë konkurse për të rekrutuar punëtorët e nevojshëm për funksionim siç duhet të RTK-së.

Gjatë vitit të kaluar deputetët kishin kritikuar numrin e madh të punëtorëve në RTK.

Në atë kohë drejtori i RTK-së, Ngadhnjim Kastrati, kishte thënë para Komisionit për buxhet se planifikon të rrisë numrin e të punësuarve në RTK.

Sipas të dhënave nga projeksioni buxhetor për vitin 2022 në RTK janë rreth 760 punëtorë.

KALLXO.com ka kërkuar të dhëna nga mediat vendore në lidhje me numrin e punëtorëve.

Dardan Belegu, drejtor i Radio Televizionit të Dukagjinit, ka thënë për KALLXO.com se në këtë media punojnë 146 persona.

Ndërsa, Eugen Saraqini nga Media 21 ka thënë se kanë 186 punëtorë.

“Në kuadër te Media 21, operojnë 6 kanale televizive, web faqe, portal”, theksoi ai për KALLXO.com

Ndërkaq sipas një publikimi të vitit të kaluar nga ministri i Financave, Hekuran Murati, Grupi Koha ka 253 të punësuar.

Sipas të dhënave nga ARBK, Klan Kosova ka 190 punëtorë ndërsa Rrjeti Ballkanik i Gazetarisë Hulumtuese, (BIRN) ka rreth 70 të punësuar.

Sindikata e Pavarur e Radiotelevizionit të Kosovës ka deklaruar gjatë javës së kaluar se rreth 150 persona janë duke punuar pa kontrata pune në këtë  institucion tash e 21 ditë.

Sipas kësaj Sindikate cilido veprim i bordit të RTK-së do të jetë shkelje ligjore për shkak se nuk ka dhënë përgjigje me kohë për këtë çështje.

Ndërsa, ushtruesi i detyrës së drejtorit të përgjithshëm të Radiotelevizionit të Kosovës, Shkumbin Ahmetxhekaj, ka thënë për KALLXO.com se nuk parashikojnë rritje të numrit të të punësuarve për këtë vit.

Ai theksoi se në projeksionin buxhetor për këtë vit është paraparë një zvogëlim i stafit në kategorinë e të punësuarve me kontrata për shërbime me rreth 60 për qind. E shprehur në numra nga 239 në më pak se 100, apo rreth 140 të punësuar më pak.

“Këto lloj kontratash që janë vazhduar për disa vite nga menaxhmentet e kaluara, nuk do të aplikohen më pas datës 31 mars 2022. Pozitat esenciale të punës në RTK që gjer tani janë kryer nga kjo kategori do të plotësohen me staf të rregullt, me konkurs publik, pas një analize të hollësishme të cdo pozite ekzistuese, veç e veç”, ka thënë ai për KALLXO.com.

Sqarimi i plotë i Shkumbin Ahmetxhekaj, u.d. Drejtor i RTK-së:

Radiotelevizioni i Kosovës nuk parashikon rritje të numrit të të punësuarve në vitin 2022, por përkundrazi një zvogëlim të konsiderueshëm.

Në projeksionin buxhetor për këtë vit është paraparë një zvogëlim i stafit në kategorinë e të punësuarve me kontrata për shërbime me rreth 60 për qind. E shprehur në numra nga 239 në më pak se 100, apo rreth 140 të punësuar më pak.

Këto lloj kontratash që janë vazhduar për disa vite nga menaxhmentet e kaluara, nuk do të aplikohen më pas datës 31 mars 2022.

Pozitat esenciale të punës në RTK që gjer tani janë kryer nga kjo kategori do të plotësohen me staf të rregullt, me konkurs publik, pas një analize të hollësishme të çdo pozitë ekzistuese, veç e veç.

(Ky artikull është edituar, duke u plotësuar me deklaratën e u.d. drejtorit të përgjithshëm të RTK-së, Shkumbin Ahmetxhekaj)