Reagon Kosnett: Duhet ruajtur vendimet e gjykatës për punimet në Deçan
Ambasadori i Shteteve të Bashkuara të Amerikës në Kosovë, Philip Kosnett ka reaguar ndaj zhvillimeve të fundit në lidhje me punimet në rrugën Deçan-Plavë.
Ai përmes një postimi në Twitter ka thënë se ndërtimi i kësaj rrugë ka të bëjë më ruajtjen e vendimeve të gjykatës dhe respektimin e të drejtave të të gjithëve .
Kujtojmë se Gjykata Kushtetuese i kishte njohur Manastirit të Deçanit si pronë një hapësirë prej 24 hektarësh tokë në atë zonë.
“Ndërtimi i autostradës Deçan-Plavë ka të bëjë më shumë se me tokën dhe qasjen. Bëhet fjalë për ruajtjen e vendimeve të gjykatës, respektimin dhe ruajtjen e të drejtave të të gjithëve për të praktikuar besimin e tyre dhe të jetojnë paqësisht me fqinjtë e tyre dhe vlerësimin e trashëgimisë së pasur dhe diversitetit kulturor të Kosovës”, ka shkruar ai,
Kosnett ka shtuar se takimi i sotëm në mes kryeministrit, Avdullah Hoti dhe kryetarit të komunës së Deçanit, Bashkim Ramosaj është drejtimi i duhur.
“Bashkëpunimi dhe angazhimi për zgjidhje që respektojnë vendimin e gjykatës është e vetmja rrugë përpara që çon në një zgjidhje të vërtetë. Takimi i kryeministrit sot me kryetarin Ramosaj është një hap në drejtimin e duhur”, ka thënë tutje në twitter, ambasadori Kosnett.
Kryeministri i Kosovës Avdullah Hoti, ka pritur në takim kryetarin e Komunës së Deçanit, Bashkim Ramosaj me të cilin janë dakorduar për të pezulluar punimet e rrugës afër Manastirit të Deçanit.
Ky takim vie pasi dje, punimet në Deçan ishin zhvilluar me udhëzim të kryetarit të Deçanit, edhe pse qeveria kishte vendosur që punimet të pezulloheshin.