Foto: Nikolla Sandulloviq/X
Reagojnë Konjufca dhe Haxhiu pas rrahjes së politikanit serb, Nikolla Sanduloviq
Kryetari i Kuvendit të Kosovës, Glauk Konjufca dhe ministrja e Drejtësisë, Albulena Haxhiu, kanë reaguar në lidhje me rrahjen e politikanit serb Nikola Sanduloviq në Serbi.
Sanduloviq kohë më parë ka qenë në vizitë në Kosovë, përkatësisht në Prekaz dhe ka kërkuar falje për krimet e Serbisë në Kosovë.
Përmes një shkrimi në Facebook, Konjufca ka thënë se përpjekja për të trembur politikanë si Sanduloviq, pikërisht pse e njeh sovranitetin e Kosovës dhe ka kërkuar falje për krimet e Serbisë ndaj shqiptarëve, sipas Konjufcës, vjen si sulm ndaj mundësisë së një pajtimi të drejtë politik mes Kosovës dhe Serbisë.
“Duke i dëshiruar shërim sa më të shpejtë z. Sanduloviq, e duke uruar që ai të dalë edhe më i vendosur nga ky sulm i rëndë, i bëj thirrje edhe komunitetit ndërkombëtar që ta dënojë këtë akt dhe të ndërmarrë veprime frenuese të brutalitetit të shtetit serb, që është i orientuar sa drejt Republikës së Kosovës, aq edhe drejt figurave publike që i shërbejnë përparimit të marrëdhënieve tona” – ka shkruar Konjufca.
“Demokracia matet me elementet brendashtetërore, por edhe me krahasimet me vendet ku ajo tashmë është etabluar rrënjësisht. E në këtë kuptim, reagimi i vendeve demokratike kundrejt këtij akti të rëndë është tepër përcaktues”.
Ndërsa ministrja e Drejtësisë, Albulena Haxhiu gjithashtu ka reaguar në lidhje me rrahjen e politikanit serb. Ajo në “X” ka thënë se Serbia është ende në vitet e ’90-ta dhe larg normalizimit të saj.
“Atje (Serbi) rrihet i vetmi opozitar Sanduloviq dhe tenton të eliminohet vetëm se e pranon të vërtetën e Kosovës. Komuniteti ndërkombëtar duhet ta dënojë këtë akt” – ka shkruar ajo.
Serbia is still in the 90s and far from its normalisation. There, the only oppositionist Sandulovic is beaten and tries to be eliminated only because he accepts the truth of Kosova. The international comm. must condemn this act. pic.twitter.com/OkYiBNnFIz
— Albulena Haxhiu (@albulenahaxhiu_) January 5, 2024
Nikolla Sanduloviq, sipas avokatit Çedomir Stojkoviq, është ndaluar nga BIA “vetëm një ditë pasi ai në rrjetin social “X” kishte publikuar një postim, duke kërkuar falje për vrasjen e 50 anëtarëve të familjes shqiptare Jashari të Kosovës më 1998” dhe “vetëm 1 minutë pasi mediat e regjimit filluan fushatë të orkestruar kundër tij për atë postim”.
Sipas avokatit, ajo që ndodhi me Sanduloviqin është skenar i njëjtë me atë që bënte Sllobodan Millosheviq, ministër i të cilit ka qenë presidenti aktual Aleksandar Vuçiq.
Avokati serb: Torturohet nga BIA politikani që shprehu keqardhje për vrasjen e familjes Jashari