Pas thirrjes online për grumbullim të parave, muzikanti Davido do të japë 600 mijë dollarë për bamirësi

Muzikanti nigeriano-amerikan Davido ka njoftuar se do të dhurojë më shumë se 600 mijë dollarë për jetimoret në të gjithë Nigerinë, pasi postoi një thirrje në internet e cila fillimisht ngjalli konfuzion te fansat e tij.

“Nëse e dini që ju kam bërë një këngë hit, më dërgoni para”, shkroi këngëtari në Twitter në fillim të kësaj jave, raporton CNN.

I njohur për këngët e tij “Dami Duro” dhe “Fall”, Davido ka qenë një nga artistët më të shquar të Afrikës gjatë dekadës së fundit dhe është artisti afrikan me numrin më të madh të ndjekësve në Instagram.

Ai nisi mbledhjen e fondeve të mërkurën, duke postuar të dhënat e tij bankare në internet dhe duke u kërkuar miqve dhe ndjekësve të famshëm të dërgonin para, duke thënë se qëllimi i tij ishte të mblidhte 100 milionë naira (243,000 dollarë) për të pastruar Rolls-Royce-in e tij.

Dhjetë minuta më vonë, ai kishte mbledhur tashmë 17,000 dollarë – dhe të shtunën ai njoftoi se shuma e plotë që mori nga fansat dhe miqtë e famshëm arrinte në mbi 485,000 dollarë dhe do të përdorej për qëllime bamirësie.

“Në mënyrën time të zakonshme lozonjare, kërkova disa ditë më parë që miqtë dhe kolegët e mi të dërgonin para për të festuar ditëlindjen time”, shkroi Davido. “Përgjigja dhe rezultati i tejkaloi pritjet e mia.”

Muzikanti, emri i vërtetë i të cilit është David Adeleke, do të mbushë 29 vjeç më 21 nëntor. Ai tha se qëllimi i tij ishte tani “të bëjë këtë mbledhje fondesh çdo vit për të festuar ditëlindjen time dhe për t’u kthyer njerëzve në nevojë”.

Ai tha se do të bënte gjithashtu një donacion personal prej 120,000 dollarë, ose 50 milionë naira, dhe emëroi një komitet që do të identifikojë jetimoret që kanë nevojë për financim dhe do të shpërndajë fondet në përputhje me rrethanat.

Thirrja për donacione fillimisht i hutoi fansat, shumë prej të cilëve kontribuan por pati edhe kritika nga përdoruesit e mediave sociale të cilët thanë se ishte e papërshtatshme që një person i famshëm të mblidhte para vetë, veçanërisht duke pasur parasysh nivelet e varfërisë në Nigeri.