OSBE reagon ndaj vendimit për dinarin serb dhe mbylljen e institucioneve serbe në Kosovë
Misioni i Organizatës për Siguri dhe Bashkëpunim në Europë (OSBE) në Kosovë ka reaguar rreth vendimeve dhe veprimeve të autoriteteve kosovare lidhur me çështjen e dinarit serb dhe mbylljen e institucioneve serbe në Kosovë.
OSBE ka bërë thirrje që të respektohen të drejtat e komuniteteve joshumicë dhe që komunikimi publik të bëhet në të dyja gjuhët zyrtare të Kosovës.
Misioni thotë se me vëmendje ka përcjellë vendimet dhe aksionet e autoriteteve të Kosovës, përfshirë Rregulloren e BQK-së që ndalon transaksionet me dinarë serbë.
“Misioni është i shqetësuar që kjo Rregullore do ketë ndikim serioz, sidomos për banorët që pranojnë pagesa në dinarë” – thuhet në komunikatën e OSBE-së.
Në komunikatë thuhet se duhet të respektohen të drejtat e komunitetit serb dhe të ketë konsultime me personat e prekur.
Ky Mision thotë se ka ndjekur edhe aktivitetet e Policisë ndaj zyreve të institucioneve serbe në komunat e Kosovës si dhe tek OJQ “Qendra për Paqe dhe Tolerancë” në Prishtinë.
“Mbyllja e papritur e objekteve që u kanë ofruar shërbime shëndetësore dhe sociale anëtarëve të komuniteteve joshumicë rrezikon të shkaktojë ndikim negativ tek individët dhe familjet duke kufizuar qasjen e tyre në disa shërbime thelbësore” – thuhet në komunikatë.
Statement by the OSCE Mission in Kosovo: pic.twitter.com/wqXvQ4ShGr
— OSCE Kosovo (@OSCEKosovo) February 4, 2024
