OSBE në Kosovë: Autorët e këtyre krimeve të neveritshme duhet të sillen menjëherë para drejtësisë
Shefi i OSBE-së në Kosovë, Michael Davenport ka reaguar në lidhje me vrasjen e një polici dhe plagosjes së një tjetri në veri të Kosovës, mëngjesin e sotëm, duke thënë se dënon në termat më të ashpër të mundshëm sulmin.
“Dënoj në termat më të ashpër të mundshëm sulmin brutal të mëngjesit të sotëm në #Policinë e Kosovës, në të cilin një oficer mbeti i vrarë dhe një tjetër u plagos gjatë detyrës në afërsi të Banjskës. Ngushëllime të përzemërta familjes dhe kolegëve të oficerit”- ka shkruar Davenport në Twitter.
Davenport ka theksuar se autorët e këtyre krimeve duhet të sillen menjëherë para drejtësisë.
“Autorët e këtyre krimeve të neveritshme duhet të sillen menjëherë para drejtësisë. Paqja duhet të rivendoset dhe dialogu në interes të të gjitha komuniteteve duhet të vazhdojë”- është shprehur Davenport.
The perpetrators of these abominable crimes must be brought swiftly to justice. Peace must be restored and dialogue in the interests of all communities must continue 2/2
— Michael Davenport (@DavenportOSCE) September 24, 2023
Kryeministri i Kosovës, Albin Kurti, ka njoftuar se mëngjesin e sotëm në fshatin Banjska të Zveçanit është vrarë një polic i Kosovës dhe një tjetër është plagosur.
Sipas Kurtit, i vrari është polic i rendit me gradën rreshter, kurse i plagosuri është pjesëtar i policisë kufitare.
