Gjykata refuzoi kërkesën për paraburgimin e zyrtarit ATK-së, i dyshuar për kontrabandim të barnave nga Serbia
Zyrtari i Administratës Tatimore të Kosovës, i cili dyshohet se me veturë zyrtare po bartte barna me banderola të Serbisë, është lënë të mbrohet në liri nga Gjykata e Mitrovicës.
L. P., ishte arrestuar më datë 1 shkurt nën dyshimet për kontrabandim me barna dhe keqpërdorim të detyrës zyrtare.
Prokuroria e Mitrovicës kishte kërkuar paraburgim për të njëjtin, por këtë kërkesë Gjykata e ka refuzuar.
Gjyqtari Avni Mehmeti ka vlerësuar se nuk përmbushen kushtet e veçanta për paraburgim, siç kërkohen me nenin 184 te Kodit të procedurës penale.
Refuzimin e kërkesës së prokurorisë për caktimin e masës së paraburgimit ndaj zyrtarit të ATK-së, e ka konfirmuar për KALLXO.com, zëdhënësja e Gjykatës së Mitrovicës, Lumnije Surdulli.
Sipas dosjes së Prokurorisë, të dyshuarit i ishin gjetur në veturën zyrtare të ATK-së dy çanta me lloje të ndryshme të barnave me banderola të Serbisë, pa poseduar asnjë dokument përcjellës.
Ndalimi i tij nga Policia ka ndodhur në fshatin Bistricë.
Administrata Tatimore kishte njoftuar se lidhur me këtë rast të dyshimtë ishin arrestuar dy zyrtarë të saj nga Policia e Kosovës.
Arrestohen dy zyrtarë të ATK-së, dyshohen për kontrabandim me barna
Për zyrtarin tjetër të arrestuar, KALLXO.com mëson se ka qenë vetëm pasagjer dhe për të njëjtin nuk ishte kërkuar paraburgim.
Tutje ajo çka mëson KALLXO.com është se zyrtari për të cilin është kërkuar paraburgimi, e ka pranuar se barnat e gjetura kanë qenë të tijat, dhe zyrtari tjetër nuk ka qenë në dijeni për të njëjtat.
Të dy zyrtarët në fjalë janë pezulluar nga pozitat e tyre zyrtare, sipas njoftimit të ATK-së.
