Begaj niset drejt Amerikës, do të marrë pjesë në asamblenë e OKB-së
Presidenti i Shqipërisë, Bajram Begaj do të niset drejt ShBA-ve për ta kryesuar delegacionin shtetëror të Republikës së Shqipërisë, që do të marrë pjesë në javën e punimeve të Sesionit të 78-të të Asamblesë së Përgjithshme (AP) të Kombeve të Bashkuara.
Të dielën e 17 shtatorit, presidenti i Shqipërisë, Bajram Begaj, do të niset drejt ShBA-ve për ta kryesuar delegacionin shtetëror të Republikës së Shqipërisë, që do të marrë pjesë në javën e punimeve të Sesionit të 78-të të Asamblesë së Përgjithshme (AP) të Kombeve të Bashkuara.
Begaj do të mbajë fjalën, në cilësi kombëtare, në debatin e përgjithshëm të AP të Kombeve të Bashkuara dhe do të marrë pjesë në Forumin e Nivelit të Lartë Politik për Zhvillimin e Qëndrueshëm, i cili do të mbahet në Nju Jork, në vigjilje të Sesionit të 78-të të AP të OKB.
Presidenca shqiptare ka njoftuar se Begaj do të mbajë fjalën në emër të Shqipërisë, në Segmentin e dedikuar të Dialogut të Udhëheqësve, përkrah kryetarëve të delegacioneve zyrtare të vendeve të tjera,
Gjatë qëndrimit në Nju Jork, Begaj do të ketë takime dypalëshe me krerë të tjerë shtetesh dhe zyrtarë të lartë amerikanë, por edhe me përfaqësues të shoqatave të diasporës shqiptare në SHBA./Dukagjini
