Pretendimi i rremë se një produkt shëron enët e gjakut
Deklarata
Ylli Merja: Zurmë në veshë dhe tension i lartë i gjakut? Ju ndjej për ju ju, keni zemër të dobët! Ju nevojitet ndihmë e menjëhershme!
Vlerësimi
Rrenë
Artikulli me titull “Ylli Merja: Zurmë në veshë dhe tension i lartë i gjakut? Ju ndjej për ju ju, keni zemër të dobët! Ju nevojitet ndihmë e menjëhershme!” është i rremë. Ylli Merja ka thënë se nuk është kardiolog si është prezantuar në këtë shkrim dhe i njëjti mohon të ketë dhënë një intervistë të tillë për ndonjë media. Në këtë artikull janë dhënë konstatime të rreme për shërbim të sëmundjeve përmes një ilaçi që nuk ka Autorizim të Marketingut për Kosovë.
Artikulli
Më 29.04.2024 faqja në Facebook ‘Bright ssj8’(arkiva) ka publikuar një fotografi mbi të cilën shkruan: Kardiologu: Ky produkt vetëm një herë në ditë ndihmon në kurimin e sëmundjeve të zemrës.
Në pjesën e poshtme të fotografisë shihet Ylli Merja ndërsa anash një citat që shkruan “Ylli Merja: Zurmë në veshë dhe tension i lartë i gjakut? Ju ndjej për ju ju, keni zemër të dobët! Ju nevojitet ndihmë e menjëhershme!”.
I njëjti artikull është publikuar është në ueb faqen ‘bestph.online’(arkiva).
Artikulli e prezanton Ylli Merja-n si kardiokirurg.
Përmes kërkimeve në internet, Krypometër ka gjetur se Ylli Meraj është një mjek popullor, i cili ka një faqe online për shitjen e produkteve të ndryshme bimore si dhe çajëra të ndryshme.
Në faqen e tij nuk është reklamuar ndonjë produkt me emrin “Hypertea”, siç thuhet në artikullin e publikuar në faqen ‘bestph.online’(arkiva).
Krypometri ka biseduar me Merjen, i cili ka thënë se intervista e prezantuar në këtë faqe është e rreme, pasi ai nuk ka bërë asnjëherë deklarime të tilla.
Merja ka thënë se bënë shitjen e disa produkteve me bazë bimore.
“Unë merrem me mjekësi alternative”- ka thënë Merje.
Artikulli gjithashtu rekomandon një lloj të çajit i cili pretendohet se rikthen enët e gjakut në 3 hapa: Shqyrton pllakat e kolesterolit. “Riparon” dëmtimet e murit të enëve të gjakut. Përmirëson konduktivitetin e impulsit nervor nga truri kryesor.
Agjencia Kosovare për Produkte dhe Paisje Medicinale është institucion i cili rregullon shitjen dhe importin e ilaçeve në Kosovë. Krypometri ka kontrolluar nëse ky ilaç është i pajisur me Autorizim të Marketingut, por në listën e azhurnuar më 25.03.2024 nuk figuron një ilaç me emrin Hypertea.
Sipas ligjit për Pajisje dhe Produkte Medicinale asnjë medikament mjekësor, përfshirë vitaminat, nuk guxojnë të shiten në vend pa lejen e këtij institucioni.
Krypometri ka pyetur edhe drejtorin i Klinikës së Kirurgjisë Vaskulare në Qendrën Klinike Universitare të Kosovës, Hajriz Rudari lidhur me këto konstatime.
“Këto konstatime nuk janë të vërteta, por vetëm reklama. E tërë kjo është vetëm reklamë dhe aspak e vërtetë”– tha Rudari për Krypometër.
Ai shtoi se artikuj të tillë të rremë ka edhe për sëmundje të tjera si kanceri, gangrena e të tjera.
