Lajmi i rremë: Publikohet fotografia e bërë vite më parë duke pretenduar se është e luftës në Ukrainë
Deklarata
Ukraina ia ‘ngrin’ në hava avionin ushtarak Rusisë: E bën shkrumb
Vlerësimi
Rrenë
Fotografia që tregon shpërthimin e një avioni në ajër nuk është bërë në Ukrainë gjatë luftimeve me Rusinë. Lajmi i publikuar nuk është i saktë. Fotografia e publikuar gjoja se tregon “avionin rus është qëlluar nga ushtria e Ukrainës” në fakt është bërë shumë kohë më parë. E njëjta fotografi është shpërndarë gjatë vitit 2017 dhe 2018. Ndërsa, foto është realizuar në Rusi shumë vite më parë që tregon incidentin gjatë ushtrimeve të ushtrisë ruse.
Artikulli
Portali kosovar ‘Periskopi’ ka publikuar një fotografi të një avioni luftarak të para disa viteve, duke shkruar se është e luftës që po zhvillohet në Ukrainë. Lajmi është publikuar me titullin:
Ukraina ia ‘ngrin’ në hava avionin ushtarak Rusisë: E bën shkrumb.
Periskopi ju referohet mediave ukrainase, por që nuk citon asnjë medium. Tutje portali ‘Periskopi’ ka publikuar një fotografi të një avioni luftarak e duke shkruar se imazhi, sipas tyre i publikuar nga media ukranase, tregon një avion rus që shpërthen në ajër.
“Sipas mediave ukrainase, avioni rus është qëlluar nga ushtria e Ukrainës”, thuhet në shkrimin e publikuar nga ky portal, por që nuk e citon asnjë medium.
Në fakt, me një kërkim të thjeshtë në ‘Google’ dëshmohet se fotografia qarkullon nëpër rrjet që nga viti 2017, e nuk ka të bëjë fare me konfliktin në Ukrainë.
Fotografia është e përdorur në vitin 2017 nga një medium francez, duke shkruar për konfliktin Jemen – Arabia Saudite, ndërsa po ashtu e njejta fotografi është përdorur edhe në vitin 2018 nga një medium nga Irani.
Ndërsa fotografia e njëjtë është në shitje në një portal tjeter, në të cilën thuhet se fotografia është bërë gjatë ushtrimeve dhe se piloti ka shpëtuar.
