Ngritet ‘alarmi’ për mos-miratimin e marrëveshjes së bashkëpunimit Kosovë-Austri
Mos-ratifikimi i një marrëveshje ndërkombëtare mes Kosovës dhe Austrisë mund të rrezikoj zhvillimin e arsimit të lartë dhe shkencës në vend. Kjo për faktin se nga kjo marrëveshje varet projekti HERAS+, projekt ky që mbështet këtë sektor.
Dje, Ministrja e Arsimit, Shkencës, Teknologjisë dhe Inovacionit, Arbërie Nagavci, përmes një postimi ka ngritur ‘alarmin’ për mundësinë e humbjes së fondeve nga projekti “HERAS+”, shkaku i mos miratimit në Kuvend të Projektligjit për ratifikimin e marrëveshjes së bashkëpunimit Kosovë-Austri.
Nagavci ka shkruar në “Facebook” se bashkëpunimi ndërmjet Ministrisë së Arsimit, Shkencës, Teknologjisë dhe Inovacionit si dhe Agjencisë Austriake për Zhvillim është shumë i rëndësishëm dhe ndihmon në ngritjen e cilësisë së arsimit të lartë.
“Projektligji për Ratifikimin e Marrëveshjes së Bashkëpunimit ndërmjet Ministrisë së Arsimit, Shkencës, Teknologjisë dhe Inovacionit dhe Agjencisë Austriake për Zhvillim – ADA për Zbatimin e Projektit “Hulumtimi dhe Shkencat e Aplikuara në Arsimin e Lartë + (Heras)”, projekt ky i cili do të financohet nga ADA dhe MASHTI (Pala Austriake financon me 2.5 milion euro, MASHTI me 300.000 euro), duhet të ratifikohet në Kuvend”, tha ajo.
Sipas saj, kjo marrëveshje është miratuar në Qeveri më 22 qershor dhe e njëjta është shqyrtuar në Kuvend me datë 16 korrik 2021, por Nagavci thekson se në mungesë te korumit (77 deputetë të pranishëm), e njëjta është shtyrë dhe vazhdon ende ne pritje për votim në kuvend.
Nagavci ka lutur të gjithë deputetët, pa marrë parasysh subjektin që përfaqësojnë, që ta votojnë këtë projektligj sa më shpejtë.
“HERAS është një marrëveshje që do të ndihmojë shumë në arsimin e lartë për të ofruar një model të mirëfilltë të kërkimit shkencor, andaj ftoj të gjithë deputetet ta votojnë”, tha ajo.
“Kuvendi është vend për debate rreth të gjitha temave, madje edhe për “betejë politike”. Megjithatë, duhet të bëjmë kujdes që në “beteja” të tilla të mos i përfshijmë miqtë tanë të cilët na kanë ndihmuar dhe na ndihmojnë me përkushtim, sidomos jo duke u shprehur me përbuzje për ndihmën që japin dhe duke i vënë në pyetje motivet e tyre, por as duke thënë të pavërteta”, tha ministrja më tej.
Reagim pati edhe nga ana e Ambasadorit të Austrisë në Kosovë, Christoph Ëeidinger, i cili përmes një postimi në Twitter më 3 nëntor, tha se është e rëndësishme që sa më herët të ratifikohet kjo marrëveshje për të mirën e të gjithë studentëve të Kosovës.
KALLXO.com përmes burimeve ka kuptuar se Ministrja e Arsimit, Arbërie Nagavci i ka shkruar dje letër edhe shefeve të grupeve parlamentare të Kuvendit të Kosovës, duke kërkuar që të votohet në Kuvend sa më shpejtë kjo marrëveshje si dhe duke i treguar detaje të projektit.
Më 25 tetor, shefi i Grupit Parlamentar të PDK-së, Abelard Tahiri kishte thënë se janë duke e përgatit një padi për marrëveshjen mes Ministrisë së Arsimit dhe Qeverisë Austriake për HERAS +, pasi sipas tij, kjo marrëveshje edhe pse nuk është miratuar në Kuvend ajo po implementohet.
“Edhe pse marrëveshja nuk është ratifiku në Kuvend këto fonde kanë fillu mu implementu. E kërkojmë ministren që të raportoj në Kuvend që edhe ne mos të procesojmë padinë”, tha ai.
Projekti HERAS (Arsimi i Lartë, Hulumtimi dhe Shkencat e Aplikuara) qëllim kryesor ka pasur që të kontribuojë në funksionimin e Arsimit të Lartë dhe Hulumtimeve në Kosovë në linjë me parimet e Zonës Evropiane të Arsimit të Lartë dhe Zonën Evropiane të Hulumtimeve me objektivë afatgjatë për të përkrahur zhvillimin socio-ekonomik të vendit.
Përfituesit kryesor kanë qenë: Ministria e Arsimit, Shkencës dhe Teknologjisë (MASHT), Agjencia e Kosovës për Akreditim (AKA) si dhe Universitetet Publike të Kosovës. Projekti është financuar nga Agjencia Austriake për Zhvillim (ADA) me bashkëfinancim nga MASHT (10%). Buxheti i planifikuar ka qenë 2,000,000 EUR (ADA 1.800.000 EUR, MASHT 200.000 EUR).