Ulet Konsumi i Energjisë për 11.7 Për Qind
Në tremujorin e dytë të këtij viti janë nxjerrë mbi 2 milionë tonë thëngjill, konsumi i energjisë ka shënuar rënie për 11.7 për qind, rënie ka shënuar edhe importi i energjisë elektrike, përderisa është rritur eksporti i saj, njofton ASK-ja.
Edhe në këtë tremujor sipas statistikave, pjesa më e madhe e energjisë është prodhuar nga termocentralet.
“Në tremujorin e dytë të vitit 2016 sasia e bruto e energjisë elektrike e prodhuar ne Termocentrale është 1,657.8 GWh, kurse në hidrocentrale është 86.9 GWh.” njofton publikimi
Përveç kësaj, Kosova importoi dhe eksportoi energji elektrike. Nga bilanci i energjisë për këtë tremujor shihet se vendi ka eksportuar më shumë sesa ka importuar energji elektrike.
“Në tremujorin e dytë të vitit 2016, Kosova ka importuar 24.9 GWh energji elektrike. Në këtë tremujor (TM 2 2016) Kosova ka eksportuar 492.3 GWh energji elektrike,” thuhet në publikim e ASK-së.
“Në krahasim me tremujorin e njëjtë të vitit të kaluar,vërehet se importi ka shënuar rënie (TM2/2015=98.8GWh), përderisa eksporti i energjisë rritje të dukshme (TM2/2015 =209.7GWh),” vijon ky publikim.
