Teknologji: Nuk jemi larg testimit klinik të barnave të zhvilluara nga inteligjenca artificiale
Inteligjenca artificiale (AI) e ka potencialin ta ndryshojë ndjeshëm mënyrën se si jetojmë, me ndikime të mundshme pozitive dhe negative, shkruan Business Insider.
Së fundmi, drejtori ekzekutiv i departamentit të zhvillimit të inteligjencës artificiale të Google, Demis Hassabis, ka theksuar se së shpejti mund të pritet përparim i madh në aplikimin e kësaj teknologjie, veçanërisht në mjekësi.
Hassabis është i bindur se IA do të jetë vendimtare në zhvillimin e ilaçeve që mund të përmirësojnë ndjeshëm shëndetin e njeriut dhe ndoshta edhe të kurojnë disa sëmundje aktualisht të pashërueshme si alzheimer ose kanceri.
Sipas tij, provat e para klinike të barnave të zhvilluara me ndihmën e IA mund të fillojnë pas disa vitesh. IA pritet të bëhet një mjet i rëndësishëm në industrinë farmaceutike, i cili mund të çojë në zbulime të reja në trajtimin e sëmundjeve.
Megjithatë, zhvillimi i ilaçeve të asistuara nga IA do të kërkojë kohë dhe testime të plota klinike për të siguruar sigurinë dhe efektivitetin e tyre. Pavarësisht sfidave, potenciali i barnave të tilla është i madh dhe suksesi mund të transformojë praktikën mjekësore dhe të përmirësojë cilësinë e jetës për njerëzit në mbarë botën.
Përveç zhvillimit të ilaçeve, IA mund të përdoret në fusha të tjera të kujdesit shëndetësor, të tilla si analiza e të dhënave mjekësore, këshilla të personalizuara për pacientët dhe mbështetje për mjekët. Megjithëse ky transformim nuk do të ndodhë brenda natës, zhvillimi i shpejtë i teknologjisë jep shpresë se së shpejti mund të presim përmirësime të rëndësishme në sistemin e kujdesit shëndetësor, të cilat mund të rezultojnë në jetë më të shëndetshme dhe më të gjatë për shumë njerëz./Business Insider
Përgatiti: Nuhi Shala
