Propozohet Skema për Zhvendosjen e 50 Mijë Refugjatëve

Komisioni Europian ka paraqitur sot një skemë të re të zhvendosjes, që lejon zhvendosjen e 50 mijë refugjatëve në Europë, gjatë dy viteve të ardhshme.

Komisioni Europian ka ndarë një fond prej 500 milionë eurosh, që do të përdoret për të mbështetur shtetet anëtare, të cilat janë të lira të marrin pjesë në mënyrë vullnetare, në skemën e zhvendosjes së refugjatëve.

“Ndërkohë që, zhvendosja nga Turqia dhe Lindja e Mesme do të vazhdojë, një vëmendje e madhe i duhet kushtuar edhe zhvendosjes së personave të pambrojtur nga Libia, Egjipti, Nigeria, Sudani, Çadi dhe Etiopia”, tha Komisioni Europian.

Skema e zhvendosjes menaxhohet nga zyra e Komisionerit të Lartë të Kombeve të Bashkuara për Refugjatët (UNHCR), i cili përzgjedh refugjatët që kanë një nevojë të vazhdueshme për mbrojtje ndërkombëtare.

Në vitin 2016, përfituesit kryesorë të programeve të zhvendosjes së lehtësuar nga UNHCR-ja ishin refugjatët nga Siria, Republika Demokratike e Kongos, Iraku dhe Somalia. /21Media