Arbërie Nagavci - Foto: KALLXO.com
Nagavci: Shkarkimi i Bordit të Agjencisë së Akreditimit, Vendim Politik
Deputetja e Lëvizjes Vetëvendosje, Arbërie Nagavci, fajësoi qeverinë e vendit për ushtrim të ndikimit politik në Agjencinë e Akreditimit.
Në debatin në kuvend, Nagavci tha se si pasojë e këtij ndikimi, cilësia në arsim “ka rënë dukshëm” në Kosovë.
“Nuk është e re as praktika e ndikimit politik në shkarkime dhe emërime kyçe qoftë në institucione apo borde. Nuk është e re edhe mungesa e plotë e llogaridhënies dhe marrjes së përgjegjësisë”, tha Nagavci gjatë debatit në Kuvend rreth përjashtimit të Agjencisë Kosovare të Akreditimit nga organizata ndërkombëtare e cilësisë, EQAR.
Sipas saj, vendimi i EQAR për ta përjashtuar AKA-n do të ketë pasoja të mëdha për Republikën e Kosovës.
“Ky vendim vjen si rezultat i shkarkimit të bordit nga ministri i Arsimit”, tha Nagavci.
Ajo tha se përjashtimi i AKA-së do të sjellë komplikim në proces të aplikimit në universitetet ndërkombëtare.
“Shkarkimi i këshillit është bërë për arsye partiake dhe kjo është tashmë praktikë partiake”, shtoi Arbërie Nagavci.
Ajo kritikoi edhe ish kryesuesin e bordit të AKA, Blerim Rexha për të cilin tha se ka pasur ngjyrim politik, duke aluduar në të kaluarën e tij si anëtar i PDK-së.
“Përgjegjësia është kryesisht e institucioneve të vendit kryesisht të kryeministrit Haradinaj duke mos përjashtu edhe ministrin Shyqiri Bytyqi”, tha Nagavci.
Sipas saj, brenda 90 ditëve institucionet e Kosovës duhet të bëjnë ankesë në vendimin për përjashtim të AKA-së nga EQAR.