Mogherini kërkon sërish heqjen e taksës ndaj Serbisë

Shefja e diplomacisë europiane, Federica Mogherini, ka përsëritur sot kërkesën e BE-së për heqjen e masës 100 për qind ndaj mallrave serbe, të cilën Kosova e ka vendosur kohë më parë.

Ajo gjatë një konference për media me kryeministren e Serbisë Ana Brnabiq në Bruksel, deklaroi se angazhimi i Serbisë për normalizimin e marrëdhënieve me Kosovën është një nga elementët kryesorë të progresit në negociatat e anëtarësimit në BE.

Kryediplomatja europiane gjithashtu përmendi taksat shtesë të vëna nga Prishtina për mallrat nga Serbia dhe Bosnja, duke thënë se qëndrimi i Komisionit Europian ishte i qartë që nga fillimi – se këto masa shkelin CEFTA-n dhe se Prishtina duhet t’i tërheqë këto masa.

Ndryshe, kryeministri i Kosovës, Ramush Haradinaj ka përsëritur se nuk do të ketë heqje të taksës ndaj mallrave serbe derisa Serbia të mos e pranojë Kosovën shtet të pavarur dhe sovran. (RTK)