May Porosit Haradinajn ta Luftojë Korrupsionin

Kryeministrja britanike Theresa May uroi sot Ramush Haradinajn për zgjedhjen në krye të qeverisë kosovare.

Në urim, sipas një komunikate të lëshuar nga Zyra e Kryeministrit, May siguroi Haradinajn se “Mbretëria e Bashkuar dhe Kosova gëzojnë miqësi të ngushtë dhe historike”.

Më tej May tregoi se si Britania dëshiron ta shohë Kosovën.

“Ne jemi të përkushtuar për Kosovën e integruar në komunitetin ndërkombëtar dhe për normalizimin e marrëdhënieve me Serbinë. Ne mbështesim fuqishëm një Kosovë stabile, të sigurt dhe prosperuese”, thuhet në urim, sipas komunikatës.

May më tutje i kërkon Haradinajt luftimin e krimit të organizuar dhe korrupsionit.

“Shpresojmë që qeveria juaj do të trajtojë me prioritet mangësitë në sistemin e drejtësisë, e gjithashtu të ndërmarrë të gjitha masat e duhura që të luftojë krimin e organizuar dhe korrupsionin”, vijon urimi.

May ia përmendi Haradinajt edhe marrëveshjen për ndihmën britanike në rekrutimin e njerëzve për pozita të larta drejtuese në administratën publike.

“Ne besojmë se bashkëpunimi Mbretëri e Bashkuar – Kosovë në këtë projekt është me rëndësi të lartë sepse nxitë profesionalizmin, llogaridhënien, dhe transparencën në administratën publike – dhe në këtë mënyrë, demonstron para botës përkushtimin e Kosovës në vlerat demokratike”, thuhet në urimin e Kryeministres britanike.

Në nëntor të vitit të kaluar KALLXO.com kishte shkruar për anulimin e një konkursi për zgjedhjen e drejtorit të Doganës së Kosovës, pasi përzgjedhja nuk ishte bërë në bazë të marrëveshjes me britanikët.

http://kallxo.com/britaniket-rol-kyc-ne-perzgjedhjen-e-drejtorit-te-doganes/

May në fund të urimit të saj ia kujton Haradinajt se do të jetë i mirëpritur në Samitin e Ballkanit Perëndimor që vitin e ardhshëm do të mbahet në Britani.