Edhe një i arrestuar nën dyshimin për falsifikim të certifikatës së veteranit të UÇK-së

Policia e Kosovës ka njoftuar se ka arrestuar një person nën dyshimin për falsifikim të certifikatës së statusit të veteranit të UÇK-së.

Përmes një komunikate, Policia thotë se më 6 shkurt të këtij viti ka pranuar një informatë lidhur me disa persona të cilët dyshohej se i kanë falsifikuar certifikatat e statusit të veteranit të UÇK-së, me arsyetimin se kanë qenë ushtarë të UÇK-së.

Rasti është iniciuar në Drejtorinë për Hetimin e Krimit Ekonomik dhe Korrupsionit (DHKEK) për dyshim të bazuar për Veprën Penale “Falsifikim i Dokumentit” dhe “Mashtrim”, lëndë e cila është trajtuar dhe vazhdon të trajtohet nga Njësia Rajonale për Hetimin e Krimeve Ekonomike dhe Korrupsion në Prishtinë.

Në lidhje me rastin me datë 14 mars 2019 janë arrestuar tre persona, ndërsa në bazë të autorizimit ligjor është kërkuar që të zhvillohen veprime të mëtutjeshme hetimore.

E sot është intervistuar një person i dyshuar me inicialet (L.D.) dhe me aktvendim të prokurorit i njëjti dërgohet në ndalim për 48 orë, për veprat penale – falsifikim i dokumenteve dhe mashtrim.

Policia e Kosovës njofton se është duke ndërmarrë veprime hetimore në vazhdimësi, sepse ekziston dyshim i arsyeshëm se mund të ketë edhe persona tjerë të përfshirë në këtë rast.