Arrestohen dy të mitur për disa raste të vjedhjeve në Prizren

Nën dyshimin për përfshirje në disa raste të vjedhjeve të rënda janë arrestuar dy persona të mitur në rajonin e Prizrenit.

Sipas njoftimit, gjatë ditës së sotme, Policia në Prizren ka pranuar informatë për një rast të kryerjes së veprës penale vjedhje e rëndë, që ka ndodhur dje në Prizren.

Policia ka njoftuar se pas një pune hetimore të njësiteve relevante policore, kanë arritur të identifikojnë dhe arrestojnë dy persona të dyshuar E. K dhe F.Th.

“Personat e dyshuar, tashmë të arrestuar, dyshohet të jenë përfshirë në disa raste të këtyre veprave penale vjedhje dhe vjedhje të rënda, ku njësitë e hetimeve pas një pune intensive kanë arritur që të identifikojnë dhe të arrestojnë të dyshuarit”, thuhet në njoftimin e policisë.

Policia tutje ka njoftuar se të miturit janë të njohur për organet e rendit si recidivistë të këtyre veprave.

Me vendim të prokurorit dy të dyshuarve u është caktuar masa e ndalimit policor për 24 orë.