Behgjet Pacolli - Foto: REL/EPA-EFE
MPJ dënon sulmin terrorist në Zelandën e Re
Ministria e Punëve të Jashtme ka reaguar pas sulmeve terroriste të cilat kanë ndodhur në dy xhami në Zelandën e Re, ku mbetën të vdekur 49 persona.
“Ministria e Punëve të Jashtme e dënon në mënyrën më të ashpër sulmin trishtues terrorist, që ndodhi të premten në dy xhami në Zelandën e Re, dhe i cili la të vdekur dhjetëra persona”, thuhet në reagimin e ministrisë.
Ministria e Punëve të Jashtme i ka shprehur ngushëllimet më të sinqerta familjarëve, që humbën më të dashurit e tyre duke e quajtur sulm i ulët dhe qyqar, duke thënë se qëndrojnë pranë popullit dhe Institucioneve të shtetit mik “në njërën nga ditët më të zeza të Zelandës së Re”, siç u vlerësua edhe nga vet Kryeministrja e këtij shteti, Jacinda Ardern.
“Ministria e Punëve të Jashtme vlerëson se komuniteti ndërkombëtar duhet të jetë i bashkuar dhe i vendosur në luftën e përbashkët kundër së keqes, dhe nuk duhet të lejohet që sulmet terroriste, të krijojë ndarje, ndjellë frikë apo nxisin urrejtje brenda shoqërive dhe komuniteteve ku jetojmë”, thuhet në reagim.
https://kallxo.com/dyzetenente-persona-te-vdekur-nga-sulmet-ne-dy-xhami-ne-zelanden-e-re/