Truproja e Vulinit që u vra bënte fushatë parazgjedhore në mbështetje të Vuçiqit në Kosovë

Bojan Mijailoviq, njëri nga terroristët e vrarë që ishte pjesëmarrës në sulmin kundër Policisë së Kosovës në mëngjesin e së dielës në Banjskë të Zveçanit, është konfirmuar se kishte qenë truprojë e Aleksandar Vulin, shefit të Agjencisë së Inteligjencës së Serbisë e njohur si BIA, gjatë një vizite në Kosovë, në vitin 2013.

Lidhjen e Mijailoviq më Vulin e konfirmoi ministri i Punëve të Brendshme të Kosovës, Xhelal Sveçla përmes një postimi në Facebook.

“Dje përmes video-pamjeve dëshmuam prezencën e kryekriminelit dhe udhëheqësin e aksionit terrorist Milan Radojiçiq. Ndërkaq, sot është konfirmuar që njëri nga të vrarët që ishte po ashtu pjesëmarrës i atij akti është edhe Bojan Mijailoviq, turpëroja e shefit të BIA-s serbe, Aleksandar Vulin, në vizitën e tij në Republikën e Kosovës në vitin 2013”- ka shkruar ministri Sveçla.

Mirëpo përmes një kërkimi në internet KALLXO.com ka mësuar se Mijailoviq kishte qenë pjesë aktiviteteve të fushatës parazgjedhore të presidentit të Serbisë, Aleksandar Vuçiq në zgjedhjet parlamentare të vitit 2020.

Në qershor të vitit 2020, disa ditë para zgjedhjeve të përgjithshme në Serbi, Mijailoviq është parë bashkë me aktivistë të jerë dhe me ish-kryetarin e Leposaviqit nga Lista Serbe, Zoran Todiq, i cili në atë ditë po vizitonte qytetarët në fshatin Jellakcë për t’iu shpërndarë ushqim dhe pajisje shtëpiake.

Siç thuhet në një komunikatë, e publikuar në faqen e Listës Serbe, dega në Leposaviq, Todiq në vizitën e tij ishte shoqëruar nga “bashkëpunëtorë dhe aktivistë të Partisë Përparimtare Serbe”.

Sipas postimit, “ aktivistët e Partisë Përparimtare Serbe Leposaviq, si shumë herë më parë, shpërndanë ndihma në formë të pakove ushqimeore, produkte higjienë dhe mjete të tjera, por edhe ofruan ndihmën dhe mbështetjen e tyre për të ardhmen”.

Mijailoviq por edhe bashkëpunëtorë e aktivistë të tjerë shihen që kanë të veshur bluza me mbishkrimin “Aleksandar Vuçiq – Për fëmijët tanë”, që ka qenë sllogani i fushatës së partisë së Vuçiqit në zgjedhjet e vitit 2020, teksa shpërndajnë ndihmat e përmendura në njoftim.

Zgjedhjet e përgjithshme në Serbi ishin mbajtur më 21 qershor të vitit 2020, kur bota po përballej me pandeminë COVID-19. Zgjedhjet fillimisht ishin caktuar të mbahen në prill por ato u anuluan për shkak të pandemisë së COVID-19.

Pjesëtari i Policisë së Kosovës, Afrim Bunjaku, u vra, një tjetër u plagos dhe një tjetër u lëndua, pas një sulmi nga një grup i armatosur në Banjskë të Zveçanit, rreth orës 3 të mëngjesit të 24 shtatorit.

Organet e rendit zyrtarisht kanë konfirmuar se tre pjesëtarë të grupit terrorist janë vrarë dhe tetë të tjerë janë arrestuar, dy prej tyre të uniformuar dhe katër të tjerë që ndihmonin në operacion përmes radiolidhjeve.

Prokuroria Speciale e kishte konfirmuar se të dyshuarit ata do të hetohen për veprat penale “Veprat e rënda kundër rendit kushtetues dhe sigurisë së Republikës së Kosovës’’, “Sulm kundër rendit kushtetues të Republikës së Kosovës’’, “Përgatitja e veprave terroriste ose veprave penale kundër rendit kushtetues dhe sigurisë së Republikës së Kosovës’’ dhe “Mbajtja në pronësi, kontroll ose posedim të paautorizuar të armëve’’.

Ministri i Punëve të Brendshme, Xhelal Sveçla, tha se Millan Radoiçiq u pa në Manastirin e Banjskës. Pamjet e marra nga droni shfaqën një grup terroristësh të armatosur e uniformuar, të cilët mbanin maska e kapela ushtarake.

Policia e Kosovës ka njoftuar se në njërën prej veturave të grupit terrorist, që është konfiskuar në Banjskë të Zveçanit, janë gjetur edhe dokumente të Millan Radoiçiqit, i cili është person i kërkuar nga autoritetet e Kosovës, njëherazi nënkryetar i Listës Serbe.

Ndërkohë, KALLXO.com ka siguruar fotografi të dokumentit që është gjetur në veturën e tipit “Mercedes G-Class”, e konfiskuar në Banjskë dhe e ekspozuar sot në kampin e Policisë “Enver Zymeri”.

Dokumentet e gjetura janë leje për posedim të armëve me emrin e Millan Radoiçiqit.

Ndërkaq, Prokuroria Speciale e Kosovës njoftoi se më 26 shtator 2023, i ka liruar 4 personat e arrestuar në Banjskë të Zveçanit, larg nga vendi i ngjarjes, në ditën e sulmit terrorist.

Sipas Prokurorisë, ata janë liruar në mungesë të provave të paraqitura nga Policia e Kosovës, përderisa tre të arrestuarit e tjerë gjenden nën masën e paraburgimit të caktuar të martën pas kërkesës së Prokurorisë Speciale.