Testamenti i Berlusconit: 100 milionë euro për të dashurën e tij 53 vjet më të re
Silvio Berlusconi, ish-kryeministri italian i cili vdiq muajin e kaluar, ua ka lënë kontrollin e perandorisë së biznesit të tij dy fëmijëve të tij më të mëdhenj dhe i ka lënë trashëgim 100 milionë euro të dashurës së tij dhe 30 milionë euro të tjera një bashkëpunëtori biznesi të burgosur për lidhje me mafian.
Testamenti i Berlusconit, duke përfshirë planet e tij për 6.8 miliardë euro të interesave të tij botuese, bankare dhe televizive, u zbuluan tri javë pasi 15,000 persona morën pjesë në funeralin shtetëror të tri herë të kryeministrit në Milano.
E dashura e Berlusconit, Marta Fascina, 33 vjeç, kishte një ulëse në rreshtin e parë në ceremoni së bashku me pesë fëmijët e manjatit mediatik dhe tani është në radhë për një pagesë të madhe pasi qëndroi pranë tij kur Berlusconi, 86 vjeç, u trajtua për leukemi para vdekjes së tij më 12 qershor.
Vitin e kaluar Berlusconi mbajti një dasmë sa për sy e faqe me Fascinën, e cila ishte 53 vjet më e e re se ai, pasi me sa duket u dekurajua të martohej me të e shtyrë nga fëmijët e tij.
Si deputete me Forza Italia të Berlusconit, Fascina quhet “Memecja” në parlament sepse ajo flet pak, por pritet ta marrë një rol me ndikim në parti, teksa lufton për t’i ruajtur votuesit partiakë pas vdekjes së themeluesit të saj.
Gjesti i Marina Berlusconit, vajza e madhe e Berlusconit, për t’u mbajtur për dore me Fascinën në ceremoninë e funeralit u kuptua gjerësisht si një demonstrim se fëmijët po e mbështesnin atë.
Një përfitues i dytë i perandorisë së Berlusconit ishte Marcello Dell’Utri, 81 vjeç, i cili e ndihmoi Berlusconin ta themelonte Forza Italia në vitin 1994 pasi kishte punuar në një nga kompanitë e tij.
Dell’Utri e prezantoi gjithashtu Berlusconin me Vittorio Mangano, një mafioz i dënuar sicilian, i cili punonte si person stabil në vilën e Berlusconit pranë Milanos, dhe vetë Dell’Utri u burgos në vitin 2014 për katër vjet për marrëveshje me mafian siciliane. Ai mbaroi kohën pasi u ekstradua nga Libani, ku kishte ikur përpara se të dënohej.
Në testamentin e tij, Berlusconi ndau aksionet e tij në kompaninë e tij mbajtëse Fininvest për t’ua lënë dy fëmijëve të tij më të mëdhenj Marina, 56 vjeç, dhe Pier Silvio, 54 vjeç, me një total 53 për qind të aksioneve kontrolluese, duke reflektuar rolet e larta udhëheqëse që ata i mbajnë në kompanitë e babait të tyre.
Marina është kryetare në Fininvest dhe gjithashtu udhëheq kompaninë botuese Mondadori ndërsa Pier Silvio menaxhon rrjetin televiziv MFE, i njohur më parë si Mediaset.
Kjo lë një pakicë të kombinuar në duart e tre fëmijëve të Berlusconit nga martesa e tij e dytë, Barbara, 38, Eleonora, 37 dhe Luigi, 34, të cilët nuk luajnë role aktive në perandorinë e biznesit.
“53 për qind për Marina dhe Pier Silvio është një shenjë e stabilitetit dhe vazhdimësisë, duke treguar se ata janë fëmijët që do të vazhdojnë t’i udheheqin gjërat,” tha Alan Friedman, biograf i Berlusconit. “Ky u shpall si versioni real i shfaqjes televizive Succession, por është më shumë si Star Trek: Gjenerata e ardhshme.”
Pier Silvio Berlusconi sugjeroi të mërkurën se kanalet e MFE-së do të vazhdojnë ta mbështesin qeverinë e koalicionit të udhëhequr nga kryeministrja Giorgia Meloni, në të cilën Forza Italia është një partner./The Times
