Sindikata e Policisë dënon sulmin ndaj zyrtarëve policorë gjatë grabitjes së armatosur në Suharekë
Sindikata e Policisë së Kosovës e ka dënuar sulmin ndaj zyrtarëve policorë gjatë grabitjes së armatosur në Suharekë të mërkurën nga katër persona të maskuar.
Gjatë grabitjes, pas intervenimit, u plagos një zyrtar policor dhe një tjetër mbeti i lënduar gjatë ikjes së të dyshuarve.
Sindikata thotë se pas tretmanit mjekësor, gjendja e policëve është stabile dhe jashtë rrezikut për jetën.
“Me datë 22 nëntor 2023, në qytetin e Suharekës, Policia e Kosovës ka intervenuar për të parandaluar një grabitje të armatosur dhe gjatë intervenimit për arrestimin e të dyshuarve janë lënduar dy zyrtar policorë, njëri me armë zjarri. Pas tretmanit mjekësorë, gjendja e tyre është stabile dhe jashtë rrezikut për jetë. Nga organet e drejtësisë kërkojmë që të veprojnë sipas Ligjit ndaj kryeseve të këtyre veprave penale me qëllim të parandalimit të sulmeve ndaj zyrtarëve policorë dhe veprave tjera penale” – theksohet në komunikatën e Sindikatës.
Sipas tyre, Policia e Kosovës janë krenaria e të gjithëve, “prandaj policëve iu jemi mirënjohës për punën, sakrificën, guximin dhe profesionalizimin që e tregojnë për çdo ditë në përmbushjen e misionit të tyre, pa kursyer as shëndetin dhe jetën e vet.”
