Premtimet e kandidatëve të Vitisë për zgjidhjen e problemit me ujë të pijshëm

Kandidatët për kryetar të komunës së Vitisë kanë dhënë premtimet e tyre në lidhje me zgjidhjen e problemit me ujë të pijshëm për disa fshatra të kësaj komune. 

Kandidati për kryetar të Vitisë, Arsim Ademi nga Lëvizja Vetëvendosje ka thënë se problemin me ujë të pijshëm në Viti do ta rregullojë me rritjen e kapaciteteve të ujit përmes dy fabrikave.

Sipas tij, te njëra fabrikë e ujësjellësit që është në funksion do të rriten kapacitetet nga 4 në 100 litra në sekond, ndërsa pjesën tjetër përmes ndërtimit të fabrikës së re me 150 litra në sekond.

“Nuk kisha dhënë kohë. Në Viti fabrika e ujit operon me 4 litra në sekond e puna e parë do të jetë që ta bëjmë që të jetë me 100 litra në sekond. Puna e dytë që do të bëjmë është një fabrikë e re me 150 litra për sekond afër lumit Morava mbi fshatin Binçë. Puna e parë do të bëhet brenda mandatit dhe do të furnizohen gjysma e fshatrave por nuk mund të premtojë ujë për të gjithë pa u kry edhe puna e dytë për të cilën na duhen fonde edhe donacione tjera, ndërsa fabrika e parë mund të kryhet me mjete vetanake”, ka thënë Ademi.

Ndërsa kandidati nga Partia Demokratike e Kosovës, Bekim Azizi tha se do ta rregullojë problemin me ujë deri në 2022 dhe 2023.

“Ka shumë probleme me ujë të pijshëm dhe është njëri prej dështimeve të Sokolit që ka bërë për dy mandate. Kjo tregon se është dështim i tij sepse për 8 vjet nuk ka ndarë asnjë fond për këtë problem. Unë premtoj që deri në 2022 dhe 2023 do të ketë ujë që e kanë rrjetin e ujësjellësit do të furnizohen me ujë të pijshëm”, ka thënë Azizi.

E kandidati për kryetar të Vitisë, Sokol Haliti nga Lidhja Demokratike e Kosovës tha se tashmë kanë memorandume të nënshkruara për disa nga fshatrat që kanë probleme me ujë të pijshëm.

“Për Remnik është nënshkruar memorandumi. Është e vërtetë që uji i Sllatinës dhe pesë fshatrave është problem që nga 2011. E kemi zgjedhur këtë problem por jemi duke i përfunduar procedurat që të kalojë nën menaxhim të “Hidromoravës”. Ka pasur një rritje të një elementi kimik – manganit dhe është duke u sqaruar”, ka thënë Haliti.

Kandidatët e partive politike, të cilët synojnë të marrin udhëheqjen e Vitisë diskutojnë në #DebatPernime për planet e tyre pas zgjedhjeve të 17 tetorit.

Të ftuar në #DebatPernime janë kandidatët për kryetar të komunës së Vitisë: Arsim Ademi  nga LVV; Bekim Azizi nga PDK dhe Sokol Haliti nga LDK. 

Përballë kandidatëve për kryetar të komunës do të jenë edhe kandidatet për asambliste në Kuvendin Komunal të Vitisë: Majlinda Ostrogllava nga LDK; Majlinda Shabani nga LVV dhe Zyrafete Rama nga PDK.