Për shkaqe shëndetësore të anëtarit të Trupit Gjykues anulohet seanca për rastin e njohur si "Brezovica"

Seanca gjyqësore në rastin e njohur si “Brezovica” nuk ka arritur të mbahet më 24.03.2025, në Gjykatën e Pejës, për shkak të arsyeve shëndetësore të anëtarit të Trupit Gjykues.

Këtë për KALLXO.com e ka konfirmuar zëdhënësja e Gjykatës së Pejës, Elzana Kastrati.

Tutje, e njëjta për KALLXO.com ka thënë se edhe seancat e planifikuara për këtë javë janë anuluar.

“Ju njoftojmë se seancat ndaj të pandehurve Bratislav Nikoliq etj., të planifikuara me datat 25, 26, 27, 28 mars 2025, janë anuluar për shkak të arsyeve shëndetësore të anëtarit të Trupit Gjykues.” – ka thënë Kastrati.

Ndryshe, edhe seanca e datës 03.03.2025 ishte anuluar për arsye shëndetësore të njërit nga të akuzuarit.

Në këtë rast të akuzuar janë edhe: Dimitrije Raçiçeviq, si Drejtor i Urbanizimit; inspektorët komunalë të ndërtimit, Hysni Bajrami e Dragomir Millosavleviq dhe si ish-Sekretar i Përgjithshëm i Ministrisë së Mjedisit; Mustafë Hyseni si Shef i Departamentit për Mbrojtje dhe Mjedis të Ujërave, Husen Ajdini si investitor, Raif Bajrami si Shef i Inspeksionit të Shtërpcës dhe të akuzuarit: Sasha Spasiq, Bedri Halimi i akuzuar në cilësinë e Kryeinspektorit, ndërkaq Sasha Millosavleviq si Shef i Drejtorisë së Kadastrës.

Gjithashtu seanca e datës 28.02.2025 nuk ishte mbajtur, pasi e njëjta paraprakisht ishte anuluar.

Emisioni Kallxo Përnime kishte raportuar ekskluzivisht se si sekserë të dyshimtë flasin për rastin që ka marrë vëmendje të madhe për publikun, rastin e njohur si “Brezovica” dhe lirimin e vilave e makinave që ishin sekuestruar në rast.

Çka thotë Aktakuza e Prokurorisë?

Sipas Aktakuzës së Prokurorisë së Ferizajit, kryetari i Komunës së Shtërpcës Bratisllav Nikoliq, nga 21.01.2016 e deri më 10.09.2018, ka keqpërdorur detyrën zyrtare, me qëllim të përfitimit të dobisë pasurore për vete dhe i ka mundësuar një investitori marrjen e lejeve ndërtimore në mënyrë të kundërligjshme, për të cilin shërbim ka marrë 200,000 euro për 19 leje ndërtimore, për një shtëpi vikendi e një pëlqim rrugor dhe 100,000 euro për lejen ndërtimore për objektin e hotelerisë “Rimida”.

Ish-kryetari i Komunës së Shtërpcës akuzohet edhe në disa Dispozitivë të tjerë të Aktakuzës për “keqpërdorim të detyrës zyrtare”.

Në Pikën dytë të Aktakuzës, i njëjti akuzohet se nga 30.01.2015 e deri më 27.05.2019, përsëri sipas Prokurorisë ka keqpërdorur detyrën zyrtare, me qëllim të përfitimit të pasurisë për vete, duke i mundësuar një personi tjetër përfitimin e lejes ndërtimore në mënyrë të kundërligjshme. Për të cilin shërbim ka marrë 140,000 euro për 14 leje ndërtimore dhe për shtëpi vikendi.

60,000 euro të tjera akuzohet nga Prokuroria se i ka marrë ish-kryetari i Komunës së Shtërpcës për lëshimin e 5 lejeve ndërtimore në mënyrë të kundërligjshme, për ndërtimin e shtëpive të vikendit. Këto objekte ishin ndërtuar në zonën e tretë të mbrojtur të Parkut “Sharri”.

Në Pikën katër të Aktakuzës thuhet se nga 23.11.2018 deri më 06.08.2019 ish-kryetari i Komunës së Shtërpcës kishte marrë 40,000 euro për lëshimin e 6 lejeve ndërtimore për shtëpi vikendi.

Aktakuza kësisoj vazhdon për “keqpërdorim të detyrës zyrtare”, për ish-kryetarin e Komunës së Shtërpcës, edhe në Pikën 5, 6, 7, 8, 9.

Në po këtë Aktakuzë Bratisllav Nikoliq akuzohet edhe për “marrje ryshfeti” e “ushtrim ndikimi”.

Në këtë Aktakuzë të përfshirë janë edhe Dimitrije Raçiçeviq, si Drejtor i Urbanizimit, inspektorët komunalë të ndërtimit, Hysni Bajrami e Dragomir Millosavleviq dhe Arben Çitaku si ish-Sekretar i Përgjithshëm i Ministrisë së Mjedisit; Mustafë Hyseni si Shef i Departamentit për Mbrojtje dhe Mjedis të Ujërave, Husen Ajdini si investitor, Raif Bajrami si Shef i Inspeksionit të Shtërpcës dhe të akuzuarit: Sasha Spasiq, Bedri Halimi i akuzuar në cilësinë e Kryeinspektorit, ndërkaq Sasha Millosavleviq si Shef i Drejtorisë së Kadastrës.

Të lartcekurit akuzohen për vepra penale, si: “marrje ryshfeti”, “keqpërdorim i pozitës zyrtare”, “ushtrim ndikimi” dhe për vepra si “armëmbajtje pa leje”.

Më 17.09.2023 Prokurori i cili po përfaqëson këtë rast Rasim Maloku kishte ndarë detaje ekskluzive për KALLXO.com – lidhur me hetimin e këtij rasti.