Sekretari i Përgjithshëm i NATO-s, Jens Stoltenberg
NATO reagon pas njohjes së pavarësisë së Donetskut dhe Luhanskut nga Rusia
Sekretari i përgjithshëm i NATO-s, Jens Stoltenberg, tha se dënon vendimin e presidentit të Rusisë, Vladimir Putin, për të njohur pavarësinë e Donetskut dhe Luhanskut, të cilat kontrollohen pjesërisht nga separatistët e mbështetur nga Moska.
Stoltenberg ka thënë se një veprim i tillë shkel marrëveshjet e Minskut, duke kërkuar nga Moska të ndalojë veprime të tilla.
“Unë dënoj njohjen nga Rusia të Donetskut dhe Luhanskut në Ukrainë. Ajo gërryen përpjekjet për të zgjidhur konfliktin dhe shkel marrëveshjet e Minskut. NATO mbështet sovranitetin dhe integritetin territorial të Ukrainës. Ne i bëjmë thirrje Moskës të ndalojë nxitjen e konfliktit dhe të zgjedhë diplomacinë”, ka shkruar ai në Twitter.
Presidenti rus, Vladimir Putin, ka nënshkruar të hënën dekretin për njohjen e pavarësisë së rajoneve ukrainase, Donetsk dhe Luhansk, të cilat kontrollohen pjesërisht nga separatistët e mbështetur nga Moska.
Rreth vendimit për të njohur këto rajone është informuar lideri francez, Emmanuel Macron dhe ai gjerman, Olaf Scholz, është thënë në deklaratën e Kremlinit.
Putin e ka nisur fjalimin e tij para kombit duke diskutuar për historinë dhe duke thënë se Ukraina moderne është “krijuar” nga Rusia.
Putin njeh pavarësinë e rajoneve në lindje të Ukrainës