Ministri Xhelal Sveçla vizitoi pikën kufitare me Serbinë

Ministri i Punëve të Brendshme, Xhelal Sveçla, dhe drejtori i Policisë së Kosovës, Sabedin Mehmeti, sot kanë vizituar pikën kufitare në Merdarë mes të Kosovës dhe Serbisë.

Siç thuhet në një njoftim të forcave të rendit, qëllimi i vizitës ishte për të parë zbatimin e vendimt të fundit për targa.

“Kjo vizitë ishte e një rëndësie të veçantë, ku ministri z. Sveçla dhe drejtori z.Mehmeti takuan zyrtarët policorë të cilët ishin në detyrë dhe panë nga afër zbatimin e marrëveshjes për lëvizjen e lirë – konkretisht targave të automjeteve, vendim ky që obligon pajisjen me targa të përkohshme për të gjitha automjetet që mbajnë targa të Serbisë dhe që hyjnë në territorin e Republikës së Kosovës”, thuhet në njoftim.

“Përveç tjerash kjo vizitë kishte të bëje edhe me njoftimin nga afër për gjendjen në pikë kalimin kufitar Merdare, përfshirë qarkullimin dhe lëvizjen e lirë të njerëzve dhe mallrave”, thuhet tutje në njoftim.

Për të zvogëluar pritjet e gjata janë ndërmarrë edhe disa hapa në pikë kalimin kufitar në Merdarë.

“Me qëllim të shmangies së pritjeve të mundshme, në këtë pikë kalim kufitar, janë ndërmarrë masat e nevojshme për të reduktuar në maksimum pritjet, duke shtuar kapacitetet e burimeve njerëzore dhe duke vënë në funksion (6) korsi për qarkullim, prej tyre (4) korsi për automjete dhe (2) korsi për mjetet transportuese, përfshirë atë të transportit të udhëtarëve”, njofton PK-ja.

Sipas Policisë, nga ana kosovare nuk ka pritje përveç realizimit të procedurave të kontrollit kufitar të cilat zgjasin afërsisht 3-5 minuta.

“Policia e Kosovës do të vazhdojë me angazhime konkrete në zbatim të ligjit, në ofrimin e sigurisë, ruajtjes së rendit dhe qetësisë publike si dhe mundësimin e qarkullimit dhe lëvizjes së lirë të njerëzve dhe mallrave”, thuhet në fund të njoftimit.