Ministri Maqedonci: Kosova do ta ndihmojë Ukrainën me predha mortajash

Ministri i Mbrojtjes, Ejup Maqedonci, ka premtuar më 19.03.2024 se Kosova do të vazhdojë ta përkrahë Ukrainën në, siç ka thënë, luftën heroike kundër agresionit rus.

Në një postim në rrjetin “X”, Maqedonci ka njoftuar se gjatë takimit të Grupit të Kontaktit për Mbrojtjen e Ukrainës ka premtuar një pako të dytë të ndihmës ushtarake për Ukrainën, e cila konsiston në predha mortajash.

🇽🇰 will continue to support 🇺🇦 in its heroic war against Russian aggression. Today at the UDCG meeting, I announced our second package of military aid for Ukraine, consisting of mortar rounds. First package with trucks, tactical and armored vehicles will be delivered next week. pic.twitter.com/TKDaeJ2O2Z

— Ejup Maqedonci (@EjupMaqedonci) March 19, 2024

Sipas ministrit Maqedonci, pakoja e parë me kamionë, automjete taktike dhe të blinduara do të dorëzohen gjatë javës së ardhshme.

Ministri Maqedonci është duke marrë pjesë në takimin e Grupit të Kontaktit për Mbrojtjen e Ukrainës që po mbahet në Gjermani.

Ky është takimi i 20-të i UDCG-së që kur Sekretari amerikan i Mbrojtjes, Lloyd J. Austin III, e ka themeluar grupin në prill 2022.

Grupi bën bashkë ministra të Mbrojtjes dhe zyrtarë të lartë ushtarakë nga rreth 50 vende, dhe në takimet e tij diskutohet kriza në Ukrainë dhe koordinimi i vazhdueshëm i ngushtë nga komuniteti ndërkombëtar për t’i ofruar popullit ukrainas mjetet e nevojshme për të mbrojtur territorin e tij sovran.