Ministrat e BE-së dakordohen për ta furnizuar Ukrainën me 1 milion predha lufte
Më 24 shkurt 2022, Vladimir Putin e nisi pushtimin ushtarak të Ukrainës duke e quajtur një “operacion special ushtarak” që synonte “çmilitarizimin” dhe “denazifikimin” e Ukrainës.
Në fjalimin e tij, Putin i përkrahu pikëpamjet irredentiste, sfidoi të drejtën e Ukrainës për shtetësi dhe pretendoi në mënyrë të rreme se Ukraina qeverisej nga neo-nazistët që persekutonin pakicën etnike ruse.
Disa minuta më vonë, raketa dhe sulme ajrore goditën Ukrainën, duke përfshirë kryeqytetin Kiev, të ndjekur nga një pushtim i madh tokësor nga drejtime të shumta.
Si kundërpërgjigjie ndaj këtij agresioni, presidenti ukrainas Volodymyr Zelenskyy e miratoi ligjin ushtarak dhe mobilizimin e përgjithshëm.
Pushtimi u dënua ndërkombëtarisht si një luftë agresioni. Një rezolutë e Asamblesë së Përgjithshme të Kombeve të Bashkuara kërkoi një tërheqje të plotë të forcave ruse, Gjykata Ndërkombëtare e Drejtësisë urdhëroi Rusinë të pezullonte operacionet ushtarake dhe Këshilli i Evropës dëboi Rusinë.
Shumë vende vendosën sanksione të reja, të cilat prekën ekonomitë e Rusisë dhe të botës dhe ofruan ndihmë humanitare dhe ushtarake për Ukrainën.
Ndërkohë, zhvillimet e fundit në dhe nga Ukraina janë si në vijim:
Raketat ruse të destinuara për përdorim nga flota e Detit të Zi të Moskës janë shkatërruar në një shpërthim në qytetin Dzhankoi në veri të gadishullit të Krimesë, ka thënë ministria e mbrojtjes e Ukrainës.
Rusia dhe Kina “ndajnë të njëjtat qëllime ose disa të ngjashme”, ka thënë lideri kinez Xi Jinping për Vladimir Putinin gjatë bisedimeve jozyrtare në Kremlin të hënën. Pas arritjes së tij, agjencia shtetërore e lajmeve Tass raportoi se Xi ka thënë se “Kina dhe Rusia janë fqinjë të mirë dhe partnerë të besueshëm”. Xi gjithashtu i ka thënë Putinit se është i sigurt se populli rus do ta mbështeste Putinin në zgjedhjet presidenciale të vitit 2024, megjithëse ai nuk ka deklaruar publikisht se do të kërkojë një mandat tjetër.
Putin i i ka thënë liderit kinez Xi se ai e mirëprit propozimin e Pekinit për t’i dhënë fund “krizës akute” në Ukrainë dhe e shikon planin me respekt. “Ju e dini se ne jemi gjithmonë të gatshëm për negociata dhe do të diskutojmë të gjitha ato pyetje, përfshirë sugjerimet tuaja”, i ka thënë udhëheqësi rus homologut të tij kinez në Kremlin.
Duke folur para takimit të tij me udhëheqësin kineza Xi, presidenti rus Putin ka deklaruar se thellimi i lidhjeve midis Moskës dhe vendeve afrikane ishte një qëllim kyç për Kremlinin. Në një fjalim televiziv drejtuar delegatëve në një konferencë parlamentare Rusi-Afrikë, Putin ka deklaruar gjithashtu se Rusia do t’u ofrojë drithë vendeve afrikane falas nëse marrëveshja për drithërat e Detit të Zi nuk zgjatet në maj.
Sekretari amerikan i shtetit Antony Blinken e ka kritikuar udhëheqësin kinez Xi për sigurimin e “mbulimit diplomatik” për Rusinë që të vazhdojë të kryejë krime lufte. Blinken ka deklaruar se vizita “sugjeron se Kina nuk ndjen asnjë përgjegjësi për të kërkuar llogari nga Kremlini për mizoritë e kryera në Ukrainë”. Blinken shprehu skepticizëm mbi propozimet e “paqes” të Kinës për t’i dhënë fund konfliktit të Ukrainës, duke paralajmëruar se ato mund të jenë një “taktikë ngecëse” për t’i ndihmuar trupat ruse në terren në Ukrainë.
Çdo plan i ardhshëm i paqes duhet t’i kërkojë Rusisë t’i tërheqë trupat e saj nga i gjithë territori ukrainas, ka përsëritur Oleksiy Danilov, sekretari i Këshillit të Sigurisë Kombëtare dhe Mbrojtjes së Ukrainës. Formula për zbatimin e suksesshëm të “planit të paqes” të Kinës duhet të përfshijë rivendosjen e “sovranitetit, pavarësisë dhe integritetit territorial” të Ukrainës, ka postuar Danilov në Twitter.
Kryeministri japonez Fumio Kishida do të takohet me presidentin e Ukrainës Volodymyr Zelenskiy në Kiev, njoftoi transmetuesi japonez NHK. Kishida ka përfunduar tashmë një udhëtim në Indi dhe është rrugës për në Ukrainë, sipas burimeve të paidentifikuara të cituara në raport.
Rusia planifikon ta mbajë një takim jozyrtar të Këshillit të Sigurimit të OKB-së në fillim të prillit mbi atë që ajo thotë se është “situata reale” e fëmijëve ukrainas të dërguar në Rusi, raporton Associated Press. Gjykata Ndërkombëtare Penale lëshoi një urdhër-arresti për Putinin për krime lufte në lidhje me rrëmbimin e fëmijëve, por ambasadori i Rusisë në OKB Vassily Nebenzia pretendoi të hënën se kjo çështje është “krejtësisht e fryrë”.
Yevgeny Prigozhin, Shefi i grupit mercenar rus ëagner, i ka shkruar ministrit të mbrojtjes të Rusisë, Sergei Shoigu, për të paralajmëruar se ushtria ukrainase po planifikon një ofensivë të afërt që synon t’i shkëputë forcat e tij nga trupi kryesor i trupave ruse në Ukrainën lindore. Në letrën e publikuar nga shërbimi i tij për shtyp, Prigozhin tha se “sulmi në shkallë të gjerë” ishte planifikuar për në fund të marsit ose fillimin e prillit. Ndaras nga kjo, Prigozhin gjithashtu e ka intensifikuar sulmin e tij ndaj Shoigu, duke e quajtur dhëndrin e ministrit një “bloger të poshtër”.
Prokurori i GJNP-së ka thënë se bota duhet të “ketë qëndrueshmëri” për ta zbatuar ligjin ndërkombëtar duke gjykuar të akuzuarit për krime lufte në Ukrainë, katër ditë pasi gjykata ndërmori masa kundër Vladimir Putinit. Karim Khan e sfidoi gjithashtu Kremlinin që t’i lejojë fëmijët ukrainas të rrëmbyer në Rusi të kthehen në shtëpi, pasi gjykata e tij lëshoi një urdhër arresti për Putinin dhe komisioneren e fëmijëve të Rusisë, Maria Lvova-Belova, me arsyetimin se ata e kanë mbikëqyrur transferimin me forcë të mijëra fëmijëve.
Ministrat e BE-së e kanë arritur një marrëveshje për ta furnizuar Ukrainën me 1 milion predha për ta forcuar mbrojtjen e saj kundër pushtimit rus. Ministrat e jashtëm dhe të mbrojtjes të BE-së janë ende duke rregulluar një plan prej 1 miliardë eurosh për prokurimin e përbashkët të municioneve nga Agjencia Evropiane e Mbrojtjes me seli në Bruksel. Një marrëveshje e tillë do të jetë një moment i rëndësishëm për BE-në, e cila ka përvojë të kufizuar në blerjen e përbashkët të furnizimeve ushtarake. Deri më tani, rreth 15 shtete pritet të marrin pjesë në nismën vullnetare.
SHBA do t’i dërgojë Ukrainës 350 milionë dollarë armë dhe pajisje, ka njoftuar Blinken. Paketa e fundit e ndihmës përfshin një numër të madh të llojeve të ndryshme të municioneve, të tilla si raketa për sistemet e raketave të artilerisë me lëvizshmëri të lartë (Himars), ka thënë në një deklaratë sekretari amerikan i shtetit, Antony Blinken.
Norvegjia i ka dorëzuar Ukrainës tetë tanke Leopard 2, ka thënë një zëdhënës i forcave të saj të armatosura. Norvegjia, e cila ndan një kufi me Rusinë në Arktik, tha se do të dërgojë gjithashtu katër tanke me qëllime të veçanta nga kategoria e saj e inxhinierisë së blinduar dhe shtresave të urës, përzgjedhja e saktë varet nga ajo që Ukraina ka nevojë më shumë./The Guardian
