Kuvendi seancë të enjten, diskutohet Raporti i Progresit për Kosovën

Gjetjet e Raportit të Progresit për Kosovën do të diskutohen nga deputetët të enjten në Kuvendin e Kosovës.

Diskutimi për Raportin e Progresit do të jetë pikë e rendit të ditës.

“Pika e parë do të jetë Raporti i Progresit për Kosovën” – deklaroi, Arben Gashi, shef i grupit parlamentar të Lidhjes Demokratike të Kosovës.

Shefi i grupit parlamentar të Partisë Demokratike të Kosovë, Ableard Tahiri, tha se një diskutim i tillë është shumë i rëndësishëm.

“Kuvendi i Kosovës do të mbajë seancën e rregullt ditën e enjte ne si PDK kërkuam që të jetë për diskutim raporti nga BE për Kosovën. Mendoj që diskutimi i një raporti të tillë duke diskutuar edhe gjetjet, edhe të arriturat është jashtëzakonisht i rëndësishëm dhe ne si Kuvend dhe si grupe parlamentare të japim kontributin ton për gjetjet”-  tha Tahiri pas mbledhjes së Kryesisë së Kuvendit.

Armend Muja, nga Lëvizja Vetëvendosje, pas mbledhjes së Kryesisë tha se në seancën e Kuvendit të enjten do të sillen për votim shtatë marrëveshje ndërkombëtare.

Ai u bëri thirrje deputetëve të opozitës të votojnë ato.

“Në seancën e së enjtes kemi disa pika që janë të rëndësishme, shumica e pikave ndërlidhen me votimin e marrëveshjeve ndërkombëtare. Siç janë marrëveshjet ajo për linjën hekurudhore 10 që lidh Prishtinën me Leshak (Mitrovicë); marrëveshja për financimin e GIZ-it për subvencione në bujqësi; marrëveshja me Danimarkën për burgjet; marrëveshja për ngrohjen në Prishtinë përmes energjisë solare që financohet nga Banka Botërore; marrëveshja për bursa me qeverinë e Francës; marrëveshja për pjesëmarrjen e Kosovës në tregje ndërkombëtare dhe marrëveshja për përkrahjen e bankës botërore për qeverise digjitale”-  deklaroi Muja.

Arben Gashi, shef i grupit parlamentar të Lidhjes Demokratike të Kosovës, tha se kjo parti ka votuar dhe do të votoj marrëveshjet ndërkombëtare.