Komuna e Pejës punëson vajzën e gjykatësit që liroi nga akuza Gazmend Muhaxherin
Ish-drejtori i auditimit të brendshëm në komunën e Pejës, Hysni Selmanaj, e quajti ‘politik’ vendimin e sotëm në Gjykatës në Pejë që ta hedhë poshtë aktakuzën ndaj kryetarit të komunës, Gazmend Muhaxheri.
Aktakuza ndaj Muhaxherit ishte ngritur për shkak se ky i fundit e kishte larguar Selmanajn nga pozita e tij në komunë.
Selmanaj është ndarë i pakënaqur me këtë vendim ndërsa ia përmendi gjyqtarit të rastit, Sejdi Blakaj, edhe punësimin e vajzës së tij si arsimtare në një shkollë të Pejës.
“Vendim i njëanshëm politik, pazare politike, ku kryetari i komunës Gazmend Muhaxheri në këmbim për lirim nga akuza e ka punësuar vajzën e gjyqtarit Sejdi Blakaj në shkollën “7 Shtatori” në Vitomiricë”, tha Selmanaj për KALLXO.com.
Kur është pyetur nga KALLXO.com për pretendimet e Selmanajt për punësimin e vajzës së tij, Blakaj i hodhi poshtë akuzat.
“Vajza ime është e diplomuar qe 5 vite, ndërsa si zëvendësim i një arsimtareje punon në shkollën “7 Shtatori”, por që kjo punë i ka dy vite prej që e njëjta punon si zëvendësim, pa vendim” , tha gjyqtari Sejdi Blakaj për KALLXO.com.
Ai tha se vendimi për hedhjen e aktakuzës “është meritor i bazuar në shkresat e lëndës, dhe se pala e dëmtuar ka të drejtë ankese”.