Kryeministri i Kosovës, Avdullah Hoti dhe drejtori i MCC-së, Sean Cairncross në Washington – Foto: ZKM
Hoti në Washington takon drejtorin e MCC-së
Kryeministri i Kosovës, Avdullah Hoti, gjatë vizitës në Washington, ka takuar drejtorin e Koorporatës Sfidat e Mijëvjeçarit (MCC), Sean Cairncross.
Sipas një njoftimi të Zyrës së Kryeministrit, Hoti me Cairncross ka biseduar për bashkëpunimin dhe realizimin e projekteve të përbashkëta ndërmjet Qeverisë së Kosovës dhe MCC-së nga programet Kompakt dhe Threshold.
Kryeministri kosovar thuhet se ka shprehur gatishmërinë e Qeverisë së Kosovës për përmbushjen e të gjitha kushteve, të cilat mundësojnë arritjen e synimeve të përbashkëta dhe jetësimin e këtyre projekteve.
“Populli i Kosovës do të jetë përherë mirënjohës për ndihmën që Shtetet e Bashkuara të Amerikës kanë dhënë për Kosovën, veçanërisht edhe nëpërmjet programit të MCC-së që mbështet përpjekjet e qeverisë për reforma në fusha të ndryshme”, citohet të ketë thënë Hoti.
Ndërsa, drejtori MCC-së, Cairncross thuhet se ka shprehur gatishmërinë e tij për bashkëpunim të mëtutjeshëm me Qeverinë e Kosovës në implementimin e projekteve prioritare, të cilat do ta ndihmojnë zhvillimin ekonomik të vendit dhe mundësojnë realizimin e granteve të MCC-së për shoqërinë civile në projektet e ndryshme.
Kurse, Hoti ka shtuar se Qeveria e Kosovës e vlerëson shumë angazhimin e MCC-së në procesin e përfundimit të Programit Kompakt për Kosovën dhe se është shumë e rëndësishme të theksohet se projektet e përfshira në zhvillimin e programeve “Kompakt” dhe “Threshold” identifikohen bashkërisht nga stafi i MCC-së dhe Qeveria e Kosovës dhe si të tilla, këto programe mbështeten plotësisht nga Qeveria.
“Duke falënderuar SHBA-të dhe MCC-në për mbështetje të vazhdueshme, kryeministri Hoti tha se Qeveria e Kosovës, duke ditur rëndësinë që kanë projektet e MCC-së për zhvillimin ekonomik të vendit, përmbushjen e nevojave afatgjate dhe përmirësimin e infrastrukturës energjetike, përmirësimin e ndotjes së ajrit dhe çështje të tjera, do të jetë e përkushtuar për plotësimin e kushteve dhe realizimin sa më të shpejtë të projekteve”, thuhet në komunikatë.
Tutje Hoti ka deklaruar se përkundër situatës së rënduar nga pandemia COVID-19, Qeveria ka ndërmarrë hapat konkretë për përmbushjen e reformave të nevojshme dhe për programin e rimëkëmbjes ekonomike “ka paraparë ndarjen e 10 milionë eurove si garanci kreditore për sektorin privat dhe energjinë e ripërtëritshme, si dhe përkrahjen e projekteve për gratë ndërmarrëse”.
Korporata e Sfidave të Mileniumit të Qeverisë së SHBA-së (MCC) përmes një deklarate, në qershor të këtij viti, kishte mirëpritur heqjen e reciprocitetit nga Qeveria Hoti për produktet e Serbisë.
MCC kishte njoftuar se do të rifillojë implementimin e projekteve në Kosovë, për zhvillim ekonomik, të cilat i kishte pezulluar në mars të këtij viti për shkak të tarifës 100 për qind.
