Gjakovë - deklarohen të pafajshëm tre të akuzuarit për korrupsion
Në gjykimin me përmbajtje nën akuza të korrupsionit kundër tre personave, Skender Ndrecajt ish-drejtorit të Infermierisë tani infermier në Spitalin “Isa Grezda” në Gjakovë, Leonora Ymeraga juriste në këtë spital dhe ish-infermieres Fatmire Sahiti, u deklaruan rreth fajësisë.
Para gjykatësit Drilon Haraçia, ata u deklaruan të pafajshëm.
Ndërkaq, gjykatësi i’u caktoi që brenda 30 ditëve të bëjnë kërkesë për hudhje të aktakuzës dhe provave të saj.
Kjo aktakuzë është e ngritur më datë 16 tetor 2020, nga prokurori Ramiz Buzhala.
Sipas aktakuzës Skender Ndrecaj, në cilësinë e personit zyrtar, drejtor i Infermierisë në Spitalin “Isa Grezda” në Gjakovë dhe Leonora Ymeraga, si juriste në zyrën e personelit në po këtë spital, dyshohet se nga muaji maj deri në muajin nëntor të vitit 2019, duke mos i përmbushur detyrat e tyre zyrtare edhe pse përmes parashtresës nga infermieri Liridon Marku, janë njoftuar se Fatmire Sahiti e punësuar si infermiere instrumentare në traktin operativ me dhomë zgjimi nuk paraqitej në vendin e punës nga data 02.05.2019, të njëjtit nuk kanë ndërmarrë veprime për të njoftuar menaxhmentin e spitalit për vazhdimin e procedurave ligjore për shkëputjen e kontratës së punës.
Sipas pretendimeve të Prokurorisë, Fatmire Sahiti i është mundësuar marrja e pagës edhe pse në periudhën kohore nga muaji maj e deri në muajin nëntor të vitit 2019, nuk është paraqitur në punë, me çka buxhetit të Kosovës i kanë shkaktuar dëm material në shumë prej 2,716.02 euro.
Në aktakuzë thuhet se Fatmire Sahiti në cilësinë e infermieres në spitalin e Gjakovës, ka keqpërdorur detyrën e saj zyrtare duke tejkaluar kompetencat e saj, sepse paraprakisht nuk ka njoftuar me shkrim menaxhmentin për shkëputjen e marrëdhënies së punës dhe e njëjta gjatë periudhës maj-nëntor 2019 ka marrë pagë mujore duke mos qenë në vendin e punës.
Në deklaratën e dhënë në Prokurori, Skender Ndrecaj, nuk e ka pranuar veprën penale për të cilën ngarkohet, duke thënë që pasi e ka pranuar shkresën nga kryeinfermieri për mos-daljen në punë të infermieres, të njëjtën shkresë e ka prezantuar në Këshillin Drejtues për marrjen e aprovimit nga Drejtori Ekzekutiv, për ndërprerjen e punës së të njëjtës.
Ndërsa, Fatmire Sahiti, duke mos pranuar veprën penale në deklaratën e saj në Prokurori ka thënë që verbalisht kishte kërkuar nga juristja Leonora Ymeraga, pushim pa pagesë ose pushim vjetor, por që i njëjti pushim i ishte refuzuar gojarisht dhe se e njëjta iu kishte treguar se më nuk del në punë, si dhe e njëjta ka deklaruar se pasi që ka kuptuar që paga po i del ende në xhirollogari, ka qenë e interesuar që t`i kthej të gjitha të hollat gjatë kohës që nuk ka punuar.
Edhe Leonora Ymeraga, nuk e ka pranuar veprën për të cilën akuzohet, në deklaratën e saj në Prokurori kishte thënë që kishte marrë vendim për shkëputjen e marrëdhënies së punës me datën 04.11.2019, të punëtores Fatmire Sahiti.
Aktakuza thotë se këto veprime të të akuzuarve janë në kundërshtim me Ligjin e Punës.