Forca të Njësisë Speciale Operative vendosen në Skenderaj

Forca të Njësisë Speciale Operative (NJSO) të Policisë së Kosovës janë vendosur në orët e mbrëmjes në Skenderaj.

Pamjet që i ka publikuar KALLXO.com shfaqin pjesëtarët e NJSO-së në rrugët e Skenderajt.

Kjo vendosje e forcave speciale ndodh pas zhvillimeve të ditëve të sotme në Skenderaj, ku kryetari i degës së LVV-së në Skenderaj, Hysni Mehani, dhe aktivisti i kësaj partie, Bahri Zabeli, kanë pretenduar se janë sulmuar fizikisht nga kryetari i Komunës, Sami Lushtaku dhe një grup personash rreth tij.

Prokuroria e Mitrovicës ka njoftuar se ka intervistuar persona të dyshuar e dëshmitarë, ndërkohë që Sami Lushtaku nuk i është përgjigjur ftesës për intervistë.

Sipas Prokurorisë, dy persona janë ndaluar për 48 orë.

Ndërsa, Mehani e Zabeli kanë marrë trajtim mjekësor.

Sulmin ndaj tyre e kanë dënuar drejtues të institucioneve.