Faton Klinaku: Nuk kemi kontakt me Kurtin prej vitit të kaluar

Faton Klinaku nga Organizata e Veteranëve të Luftës së UÇK-së është deklaruar para mediave në lidhje me takimin që ka zhvilluar me presidenten, Vjosa Osmani.

Klinaku tha se tek presidentja kanë paraqitur shqetësimet e tyre, që sipas tij është edhe adresa e fundit për OVL UÇK-në.

“Paraqitëm të gjitha shqetësimet tona që i kemi përkitazi me shkeljet të ndryshme që vazhdimisht i ka bërë Qeveria dhe i treguam që adresa jonë e fundit ka mbetur presidentja për shkak se këto detyra që i ka të përcaktuara me ligj dhe Kushtetutë, nuk i ka shfrytëzu edhe rregullu as kryetari i Kuvendit, Glauk Konjufca” – tha Klinaku.

Ai theksoi se me kryeministrin Albin Kurti nuk kanë pasur kontakt që nga viti i kaluar, teksa shton se as Qeveria dhe as Kuvendi nuk u janë përgjigjur shkresave.

“Nuk kemi kontakt me kryeministrin qysh prej vitit të kaluar. Fatkeqësia është që ne nuk kemi kontakte asnjëherë, as nuk kemi pasë me këshilltarin e kryeministrit që është për kategoritë e dala nga lufta, e keqpërdorin një kafe që e kam pi para teatrit shoqërisht sepse kam qenë bashkëluftëtar i tij dhe marrin si takim të rregullt që është e pavërtetë” – ka thënë Klinaku.

“Kjo qeveri dhe ky kuvend nuk ka pasur kontakt me neve sepse ne si organizata, ka edhe shkresa apo emaile që ju kemi dërgu dhe nuk kanë përgjigje”- shtoi ai.

Për verifikimin e veteranëve të luftës, Klinaku deklaroi se nuk i takon Kurtit që të merret me këtë çështje kur verifikimi është bërë nga komandantët dhe se dosja është në Prokurori.

“I treguam se cilat ligje i shkelë kjo Qeveri edhe pse i kanë shkelë më herët edhe qeveritë tjera sepse çdo ligj që është miratu, ministritë e kanë pasë për obligim me i nxjerrë aktet nënligjore dhe nuk e kanë bë. Qeveria aktuale jo që po i shkelë ligjet por vazhdimisht për opinionin po trumbeton për një shifër apo një numër që nuk është kompetencë e tij sepse çdo verifikim i veteranëve është bërë me komandantët dhe zinxhirin komandues dhe të gjitha aplikacionet janë në prokurori dhe është procesi në gjyq dhe deri sa të përfundon ai proces Qeveria nuk ka të drejtë me bo ligje të reja as ndërhyrje” – ka thënë Klinaku.

Më tej, Klinaku tha se presidentja i ka marrë me shkrim për ligjet në të cilat duhet të bazohet dhe shtoi se kundërshtimet e tyre do të vazhdojnë duke paralajmëruar një protestë në ditën që mbahet seanca e Kuvendit.

“Presidentja i mori me shkrim ato që ia dhamë ne se në cilat ligje të bazohet. Presidentes i thamë që të luajë rolin që ka atë të unitetit sepse kjo qeveri është e interesuar që të krijojë sa më shumë përçarje e ndoshta edhe të përfitojë vota”- tha Klinaku.

“Kundërshtimet tona vazhdojnë, ne e kemi të paralajmëruar protestën tonë me 26, atë ditë që mbahet seanca”- shtoi ai.

Përfaqësuesit e OVL-UÇK-së kanë kundërshtuar së fundmi votimin e pagës minimale nga Kuvendi i Kosovës, duke kërkuar që në pagën minimale të përfshihet edhe pensioni i veteranëve të luftës.

Pakënaqësitë, veteranët i shprehën e të shtunën pasdite në një protestë në sheshin “Skënderbeu” në Prishtinë

Presidentja Osmani pritet t’i takojë përfaqësuesit e OVL-UÇK-së