Ekzekutivi ndan mjete për shtesat në pagë për ShKK-në, Doganat, ATK-në dhe AUV-n

Qeveria në detyrë e Kosovës, në mbledhjen e sotme ka ndarë mjete financiare për pagesën e shtesës në pagë për Shërbimin Korrektues të Kosovës, Doganat e Kosovës, ATK-në, dhe AUV-në.

Sipas njoftimit, kjo është bërë për shkak të angazhimit të shtuar gjatë pandemisë COVID-19, si dhe plotësim ndryshimin e vendimeve të Qeverisë që kanë të bëjnë me mjetet nga Programi i Rimëkëmbjes Ekonomike.

Qeveria në detyrë gjithashtu ia ka ndalë 10 milionë euro Ministrisë së Shëndetësisë për blerjen e materialeve, aparaturave mjekësore si dhe angazhimin e personelit shëndetësor dhe mbështetës, për menaxhimin e pandemisë COVID-19.

Kurse, Ministrisë së Ekonomisë dhe Ambientit i janë ndarë 8 milionë euro, për subvencionimin e tarifës për Burime të Ripërtëritshme të Energjisë.

Ndërkaq, Ministrisë së Kulturës, Rinisë dhe Sportit i janë ndarë 500 mijë euro, për kryerjen e obligimeve financiare të kësaj ministrie.

Në këtë mbledhje, Qeveria në detyrë ka miratuar vendimin për kompensimin financiar të njëhershëm për delegatët e legjislaturës së vitit 1990 të cilët kanë certifikuar mandatin e deputetit në mbledhjen e Kuvendit të Kosovës të datës 4 dhjetor 1999, që kanë marrë pjesë në Mbledhjen e Kuvendit të Kosovës me datën 2 korrik 1990 dhe me datën 7 shtator 1990 si dhe kanë vazhduar të marrin pjesë në mbledhjet e Kuvendit deri më datën 24 maj 1992.

Gjithashtu, Qeveria ka aprovuar kërkesën e Sindikatës së punëtorëve të Lotarisë së Kosovës për ndarjen e mjeteve financiare në shumë prej 40, mijë eurosh për mbështetje financiare për punonjësit e saj.

“Është miratuar edhe vendimi për ndryshimin dhe plotësimin e Vendimit të Qeverisë nr. 09/09 të datës 01.07.2020 për themelimin e Komisionit të Ankesave për të Huajt”, thuhet në njoftim.

Mes tjerash ekzekutivi në detyrë, ka miratuar nismat për negociimin e Marrëveshjes së Kredisë midis Republikës së Kosovës dhe Bankës Evropiane për Investime, për financimin e projektit “Reagimi i Kosovës ndaj pandemisë Covid-19 për NVM-të”, si dhe për negocimin e Marrëveshjes së Grantit në mes të Republikës së Kosovës dhe Bashkimi Evropian, për Projektin “Mbështetja e BE-së për disponueshmërinë dhe qasjen në vaksinat kundër COVID-19 në Kosovë”.

Sipas njoftimit, Qeveria në detyrë ka miratuar edhe vendimin për pagesën e specializantëve me vetëfinancim, nga kategoria ekonomike subvencione dhe transfere, prej datës 1 mars deri më datë 31 tetor 2021.