Dekani i Fakultetit të Bujqësisë: Nëse deri në dhjetor të vitit 2026 nuk kalojmë në objektin e ri na hiqet akreditimi

Dekani i Fakultetit të Bujqësisë dhe Veterinarisë të Universitetit të Prishtinës, Arben Musliu, e ka pranuar se me të drejtë Agjencia e Kosovës për Akreditim ua ka mbyllur programet e studimit në këtë Fakultet për shkak të infrastrukturës.

Këtë deklarim, dekani Musliu e bëri në mbledhjen e Senatit të UP-së më 26.03.2025 derisa u shqyrtua Rregullorja për procesin e vlerësimit të brendshëm në procedurën e akreditimit dhe riakreditimit institucional dhe atë të programeve të studimit në UP. 

Ministrja e Arsimit, Arbërie Nagavci kishte njoftuar më 15.08.2024 se Këshilli Shtetëror i Cilësisë (KSHC) ka vazhduar akreditimin për një vit të programeve të studimit të Fakultetit të Bujqësisë dhe Veterinarisë për vitin akademik 2024/2025. Ky akreditim pothuajse u rrezikua për shkak të problemeve ekzistuese me infrastrukturën fizike të Fakultetit.

“Me të drejtë Agjencia e Akreditimit na ka mbyllë të gjitha programet. Me të drejtë për shkak të infrastrukturës, tash përgjegjësia e infrastrukturës e kujt është. 90% e standardeve kanë qenë extra ordinary fulfilled (ekstra të zakonshme të plotësuara). Një standard s’ka qenë i plotësuar – infrastruktura. Tash, përgjegjësia përveç stafit, e të gjithëve duhet me qenë, edhe zyrës, edhe Rektoratit, edhe Fakultetit” – ka thënë Musliu më 26.03.2025.

Musliu theksoi se u rrezikohet përsëri akreditimi i programeve të studimit në rast se nuk kalojnë në objekt të ri deri në dhjetor 2026.

“Tash jemi akreditu, e kemi marrë për disa programe trevjeçarin, por në të njëjtin plan e thot deri në dhjetor të 2026 në qoftë se nuk kaloni në objektin e ri, largohet akreditimi. Kështu që është shumë kritike kjo çështje e infrastrukturës për të gjithë, sepse dy standardet kryesore për akreditim është – infrastruktura edhe teach-i – edhe mësimi” – tha Musliu.

Rektori i UP-së, Arben Hajrullahu, u pajtua me dekanin Musliu, duke thënë se përgjegjës janë “prej Rektorit, Këshillit Drejtues e të gjithë, rend”.

Mirëpo, në kohën kur u paraqit kjo çështje e akreditmit në Fakultetin e Bujqësisë dhe Veterinarisë, UP udhëhiqej nga ish-rektori Qerim Qerimi.

Rektori Hajrullahu shtoi se “jemi në rrugë të mirë për me i zgjidhë problemet atje, me funksionalizu objektin e ri [të Fakultetit të Bujqësisë dhe Veterinarisë]”. 

“Ju keni serra e keni atje edhe punë fushore, praktika e krejt, po pa objekt nuk na akreditojnë. Po kjo është një sfidë e trashëguar, me të cilën jemi duke u marrë” – tha Hajrullahu.

“Ta ngrisim cilësinë e personelit akademik që për besë tani me dorë të majtë na m’i akreditu programet, po për me ba kështu na duhet me pasë fort kujdes kënd po e pranojmë profesor” – ka theksuar Hajrullahu gjatë mbledhjes së Senatit.

Hajrullahu ka treguar se e ka parë një faturë mbi 200,000 euro për pagimin e taksave të proceseve të akreditimit për UP-në, e që disa prej tyre kanë dështuar për arsye të ndryshme.

Një tender me vlerë të parashikuar prej 1 milion e 641 mijë euro për “Funksionalizimin e objektit të ri të Fakultetit të Bujqësisë dhe Veterinarisë” ishte hapur më 13.05.2024. Këtë tender, Universiteti i Prishtinës e anuloi 11 ditë më vonë, përkatësisht më 24.05.2024, me arsyetimin se “ka mungesë të fondeve” për këtë projekt.

Në një raportim të KALLXO.com më 05.08.2024, kryesuesi i Këshillit Drejtues të UP-së, Altin Sahiti, e kishte arsyetuar anulimin e tenderit duke thënë se ky organ ishte anashkaluar me rastin e hapjes së këtij tenderi.

“Së fundi e kemi pranu një auditim të veçantë, që e ka kërku rektori Qerim Qerimi në lidhje me prokurimin e ndërmarrë për rifunksionalzimin e Fakultetit të Bujqësisë, i cili ka vënë në pah ca parregullsi dhe që konstaton që është menjanu kompetenca e Këshillit Drejtues dhe ne kur e kemi lëshu vërejtjen për sekretarin e përgjithshëm kemi thënë që kjo vetëm të jetë deri në konstatimin e shkeljes dhe masat që do t’i ndërmarrim do të jenë ato në bazë të konstatimit që vjen, që në këtë rast është raporti i auditimit të brendshëm” – kishte thënë Sahiti më 26.09.2024.

Në anën tjetër, me 8 vota për, asnjë kundër dhe asnjë abstenim, Këshilli Drejtues i UP-së e kishte liruar nga detyra ish-sekretarin e përgjithshëm të UP-së, Besfort Krasniqi, në mbledhjen e tyre të datës 26.09.2024.

Krasniqi ishte liruar nga detyra pas votimit të fshehtë të anëtarëve të Këshillit Drejtues dhe pasi është vlerësuar si përgjegjës për keqmenaxhim të buxhetit të UP-së. 

Para se të votonin për lirimin nga detyra të sekretarit Krasniqi, Këshilli Drejtues i UP-së kishte shqyrtuar një raport të auditimit të brendshëm të UP-së, i cili kishte të bëjë edhe me objektin e Fakultetit të Bujqësisë dhe Veterinarisë.

Kurse, ministrja Nagavci në konferencën për media të datës 24.07.2024 kishte thënë se ndërtimi i objektit të Fakultetit të Bujqësisë të UP-së ka filluar rreth 8 vjet më parë dhe se Këshilli Drejtues i UP-së e ka dërguar në Prokurori për shkak të pretendimeve se është abuzuar me kontratën e ndërtimit të këtij Fakulteti.

“Ai Fakultet ndonëse janë realizuar pagesat, nuk është ndërtuar asnjëherë. Ka probleme serioze. Unë e kam vizituar para pak kohe dhe për të njëjtën Universiteti i Prishtinës, gjegjësisht kryesuesi i Këshillit Drejtues tashmë ka dërguar lëndën në Prokurori, sepse ka pretendime për abuzime me kontratën në ndërtim të Fakultetit. Pra përveç se është keqpërdorur me buxhetin e shtetit është rrezikuar edhe akreditimi i programeve të reja” – kishte deklaruar ministrja Nagavci më 24.07.2024.

Për shkak të kësaj situate me akreditimin e programeve të Fakultetit të Bujqësisë të UP-së edhe konkursi për pranimin e studentëve të vitit të parë në studimet themelore në vitin akademik 2024/2025 në këtë Fakultet u vonua disa ditë krahasuar me konkursin për pranimin e studentëve në 12 fakultetet e tjera të UP-së.

Në lidhje me hapësirat ku UP planifikonte të realizohet mësimi i studentëve të Fakultetit të Bujqësisë, ish-prorektorja Njomza Llullaku kishte treguar për KALLXO.com se ato hapësira janë në Fakultetin e Inxhinierisë Elektrike dhe Kompjuterike të UP-së (FIEK).

“Hapësirat janë te Fakulteti i FIEK-ut, është një hapësirë që është korridor dhe 4-5 salla që mjaftojnë për me u zhvillu mësimi dhe këto janë si tranzicionale derisa të bëhet objekti që sipas personave që po punojnë në këtë edhe sekretarit (të UP-së) po edhe rektorit, kjo detyrë është e Këshillit Drejtues dhe pritet që do të jetë brenda vitit, të finalizohet objekti me problematikat të cilat i ka pasë” – kishte thënë Llullaku më 10.07.2024.