Barikadat e vendosura në fshatin Rudar, Komuna e Zveçanit, Foto: KALLXO.com
BE: Sulmet ndaj gazetarëve në veri, të papranueshme
Zyra e Bashkimit Evropian në Kosovë e ka dënuar sulmin e fundit ndaj gazetarëve në Zubin Potok, në veri të vendit, duke thënë se sulmet e tilla janë të papranueshme.
Sipas BE-së, siguria e gazetarëve nuk duhet të rrezikohet.
“Ky dhe incidentet e mëparshme që e ndikojnë punën e mediave janë të papranueshme. Mediat kanë çdo të drejtë të raportojnë. Siguria e tyre nuk duhet të rrezikohet” – thuhet në reagimin e Zyrës së BE-së, e cila i dëshiroi shërim të shpejtë ekipit të gazetarëve.
Asociacioni i Gazetarëve të Kosovës (AGK), e ka quajtur alarmante sulmin ndaj gazetarëve të Klan Kosovës, në veriun e vendit.
Sot persona të maskuar e kanë sulmuar ekipin e Klan Kosovës në fshatin Zupç të Zubin Potokut.
AGK-ja përmes një komunikate, ka thënë se sulmet e vazhdueshme përbëjnë një kërcënim serioz për sigurinë e gazetarëve.
“Sulmet e vazhdueshme përbëjnë kërcënim serioz për sigurinë e gazetarëve dhe pengojnë raportimin për zhvillimet në veri. Andaj, AGK-ja, kërkon nga KFOR-i dhe EULEX-i që të luajnë rol shtesë për të garantuar sigurinë fizike të gazetarëve, që vazhdojnë të jenë cak i sulmeve të organizuara nga grupe personash të maskuar” – thuhet në reagim.
Ekipi i përbërë nga gazetarët Qëndresa Bellagoshi, Drin Demiri, kameramani Agon Bejtullahu dhe shoferi Elsad Sinani, janë sulmuar sot në fshatin Zupç. Gazetarja Bellagoshi dhe shoferi Sinani kanë marrë trajtim mjekësor, pasi që xhamat e veturës së thyer nga gurët i kanë goditur në fytyrë. Teksa, Demiri dhe Bejtullahu kanë shpëtuar pa lëndime.
Në anën tjetër, Policia e Kosovës ka thënë se po kryen hetime me qëllim të zbardhjes së rastit në të cilën sot në fshatin Zupçe të Zubin Potokut, nga persona të dyshuar është sulmuar një ekip me gazetarë të televizionit Klan Kosova.
Barrikadat në veri janë ngritur që nga 10 dhjetori nga disa serbë lokalë, në shenjë proteste ndaj arrestimit të ish-pjesëtarit të Policisë së Kosovës, Dejan Pantiq, i cili akuzohet për organizimin e “sulmit terrorist” në zyrat e Komisionit Qendror të Zgjedhjeve.
Që nga atëherë janë shënuar një numër i incidentesh, ku përveç gazetarëve janë sulmuar edhe pjesëtarë të Policisë së Kosovës dhe trupave ndërkombëtare, si EULEX dhe KFOR.
