Pezullohet greva në Teatrin Kombëtar të Kosovës, aktorët i kthehen skenës

Shoqata Sindikale e Artistëve të Teatrit Kombëtar të Kosovës (SHSATKK) ka njoftuar se ka pezulluar grevën e nisur më 18.11.2024, me kërkesën për rishikimin apo ekuivalentimin e pagave të aktorëve të këtij Teatri.

Vendimin e saj për pezullim të grevës, SHSATKK e mori të premten vonë, më 28.02.2025, pas një premtimi verbal të marrë nga bordi (Këshilli Drejtues) i Teatrit Kombëtar se kërkesat e tyre do të zgjidhen brenda tri javëve.

“Pas një greve tre mujore dhe insistimit tonë të vazhdueshëm për një konfirmim zyrtar nga Ministria e Kulturës lidhur me afatin e zgjidhjes së çështjes së ekuivalentimit të pagave të aktorëve, na është komunikuar verbalisht nga një anëtare e Bordit të Teatrit Kombëtar se ministri Hajrullah Çeku është zotuar që kjo çështje do të zgjidhet brenda tre javësh”- thuhet në njoftim.

SHSATKK thot se në momentin që merr një konfirmim zyrtar nga MKRS-ja se ky zotim do të realizohet brenda afatit të deklaruar nga vetë ministri Hajrullah Çeku, do ta ndërpresin përfundimisht grevën.

“Deri atëherë, me shumicë votash (9 pro, 5 kundër, 2 abstenim), sindikata vendos ta pezullojë grevën dhe t’i rikthehet skenës”- thuhet më tej në njoftim.

Por, sindikalistër kanë bërë me dije se nëse brenda afatit të përcaktuar kjo çështje nuk zgjidhet (brenda tri javëve), duke pasur mirëkuptim për pengesat eventuale, do të presin edhe tri javë të tjera.

“Nëse edhe pas kësaj periudhe nuk kemi një konfirmim zyrtar nga MKRS-ja për aprovimin e kërkesës sonë për ekuivalentimin e pagave, ne rezervojmë të drejtën për të rifilluar grevën dhe veprimet e tjera sindikale, në përputhje me të drejtat tona ligjore”- thuhet në njoftimin e SHSATKK-së.

Njëkohësisht, aktorët- sindikalistë njoftojnë publikun se po kthehen në skenë dhe e mirëpresin me kënaqësi në shfaqjet e tyre.

Nga 18.11.2024, aktorët e TKK-së kanë nisur një grevë të përgjithshme, e cila ka paralizuar punën në këtë Teatër.

Kërkesat e grevistëve janë që të bëhet rishikimi dhe rritja e koeficientëve të pagave sipas meritave për artistët e Teatrit.

Për shkak të grevës, Teatri Kombëtar ka anuluar mbajtjen e festivalit “Moisiu”, i cili ishte planifikuar të hapej me premierën e shfaqjes “Emira”, më 20.11.2024.

Më 16.09.2024, SHSATKK nisi një aksion sindikal paralajmërues me kërkesë për rishikimin dhe rritjen e koeficientëve të pagave për aktorët e trupës rezidente dhe të punëtorëve të tjerë të TKK-së. Fillimisht, duke filluar provat me 10 minuta vonesë, më 16.09.2024.

Kurse, hapin e radhës lidhur me këtë kërkesë SHSATKK e mori më 14.10.2024, me shtyrjen për një orë të dhënies së shfaqjes “1984”, në kuadër të Festivalit “Skupi International Theatre Festival 2024” në Shkup, që nisi edicionin me shfaqjen e TKK-së.

Më 01.11.2024, SHSATKK e shtyu për 15 ditë grevën e përgjithshme, për të nisur përfundimisht më 18.11.2024.