Bulliqi e mban premtimin për renovimin e palestrës sportive “Hakif Zejnullahu” (FOTO)

Shpejtim Bulliqi (08.01.2021) “Shumë shpejt do të bëhen investimet në rregullimin e infrastrukturës së palestrës “Hakif Zejnullahu””.

Kryetari i Komunës së Podujevës, Shpejtim Bulliqi, në janar të vitit 2021, gjatë vizitës që e kishte bërë në palestrën sportive “Hakif Zejnullahu”, kishte premtuar që do të bëhen investime në rregullimin e infrastrukturës së palestrës.

Bulliqi këtë premtim e kishte dhënë pa përmendur afate kohore, por që kishte cekur se shumë shpejt do të bëheshin investime në rregullimin e infrastrukturës.

“Shumë shpejt do të bëhen investimet në rregullimin e infrastrukturës së Palestrës “Hakif Zejnullahu””, kishte deklaruar Bulliqi.

KALLXO.com ka komunikuar me zëdhënësin e Komunës së Podujevës, Fahri Zhitia, i cili e ka konfirmuar se punimet në këtë palestër janë përfunduar.

Ai tha se më 25 shtator është publikuar njoftimi se është përfunduar renovimi i palestrës sporteve “Hakif Zejnullahu” në Podujevë.

“Kanë përfunduar punimet në renovimin e palestrës së sporteve “Hakif Zejnullahu”, me këtë rast kryetari i Komunës, Shpejtim Bulliqi i shoqëruar nga drejtoresha e Kulturës, Rinisë dhe Sportit, Elhame Kutllovci, kanë vizituar palestrën dhe i kanë uruar sportistët, ku tash e tutje ata mund të zhvillojnë në kushte shumë më të volitshme aktivitetet dhe garat sportive”, thuhet në njoftim.

Kryetari Bulliqi ka thënë se në palestër është ndërruar tërësisht dyshemja, është rregulluar ndriçimi, ngrohtorja, banjot, zhveshtoret, tribunat dhe nyjet sanitare.

“Me këto intervenime, sportistët dhe sportdashësit do të kenë kushte shumë më të volitshme për zhvillimin e aktiviteteve dhe garave sportive”, tha tutje Bulliqi.