VV Dërgon në Kushtetuese Demarkacionin

Shefi i grupit parlamentar të Lëvizjes Vetëvendosje, Glauk Konjufca në emër të deputetëve nënshkrues ka dorëzuar në Gjykatën Kushtetuese Kërkesën për “Vlerësimin e Kushtetutshmërisë së Projektligjit nr.06/L-060 për Ratifikimin e Marrëveshjes për Ratifikimin  për Kufirin Shtetëror në mes të Republikës së Kosovës dhe Malit të Zi”.

Pas dorëzimit në Gjykatë Kushtetuese, Konjufca ka thënë se presin nga Gjykata Kushtetuese një trajtim të paanshëm, pa ndikime, profesional dhe në mbrojtje të kushtetueshmërisë, rrjedhimisht dhe të moscenimit territorial të Republikës së Kosovës.

“Shkelja më e rëndë ka të bëjë me sovranitetin dhe integritetin territorial të Republikës së Kosovës, është neni 2 i Kushtetutës së Kosovës, paragrafi 2, i cili thotë që integriteti territorial i Republikës së Kosovës është i pacenueshëm dhe është i patjetërsueshëm”, ka thënë Konjufca.

Shefi i grupit parlamentar të VV-së, ka thënë se shpresojnë që Gjykata Kushtetuese ta trajtojë lëndën e dorëzuar nga Lëvizja Vetëvendosje dhe sipas argumenteve dhe duke iu referuar Kushtetutës të konkudojë se me ratifikim të kësaj marrëveshjeje ka pasur faktikisht shkelje të rëndë të Kushtetutës së Republikës së Kosovës.

Marrëveshja e demarkacionit u ratifikua më 21 mars. Gjatë seancës në lidhje me ratifikimin deputetët e VV-së hodhën katër herë gaz lotsjellës.

http://kallxo.com/ratifikohet-demarkacioni/