Prokurori Mungon në Gjykimin për Kamionin e Zjarrfikjes

Seanca e dytë e gjykimit ndaj tre zyrtarëve të Drenasit në lidhje me blerjen e një kamioni për fikjen e zjarrit nuk u zhvillua ngase mungoi prokurori.

Sipas aktakuzës, Hyrije Xhemajli-Thaçi, Shyqyri Bublaku, Vehbi Jashari dhe drejtori i kompanisë “Agribau”, Naim Berisha, e shkelën Ligjin e Prokurimit në rastin e kontratës për blerjen e një kamioni për fikjen e zjarrit për nevoja të Komunës së Drenasit.

Prokuror ne seancën e kaluar ka qenë Armend Hamiti por gjyqtari Valon Kurtaj tha se ky prokuror e ka njoftuar që në atë seancë ishte vetëm zëvendësues.

Kurtaj tha se ka provuar të kontaktojë edhe kryeprokurorin Imer Beka, por tha se Beka nuk e ka hapur telefonin.

Seanca e këtij gjykimi u caktua më 17 maj.

Katër të akuzuarit më 13 prill u deklaruan të pafajshëm.

http://kallxo.com/zyrtaret-e-komunes-se-drenasit-dalin-para-gjyqit-per-blerjen-e-kamionit/

Hyrije Xhemajli-Thaçi, Shyqyri Bublaku, Vehbi Jashari akuzohen se në shtator të vitit 2015 në cilësinë e personave zyrtarë të Komunës së Drenasit e kanë shkelur nenin 81.2 të Ligjit mbi Prokurimin Publik, kur më 29 shtator 2015 kanë nënshkruar kontratën mes Komunës së Drenasit dhe kompanisë “Agribau”, drejtor i së cilës ishte i pandehuri Naim Berisha.

Sipas aktakuzës së Prokurorisë, të akuzuarit kanë bërë pagesën prej 110 mijë eurove ndërsa nuk e kanë pranuar mallin (kamionin) në kohën e duhur ashtu siç ishte kontraktuar.

Prokuroria pretendon se të akuzuarit ishin në dijeni se kamioni nuk i plotësonte kriteret sipas kontratës  dhe se i njëjti ka qëndruar në pikën doganore të Hanit të Elezit, ku ishte ekzaminuar nga ekspertët dhe nga ku ka rezultuar se nuk i përmbushte kriteret e parapara me kontratë.

I akuzuari i katërt i këtij rasti, Naim Berisha, sipas aktakuzës u ka ndihmuar të akuzuarve të tjerë të këtij rasti në atë mënyrë që paraprakisht u ka premtuar fshehjen e përfitimit që do të rrjedhë nga kryerja e veprës penale duke mos e zbatuar kontratën e lidhur mes firmës së tij dhe Komunës së Drenasit.

Në shkurt të vitit të kaluar këta zyrtarë ishin ndaluar nga policia.

http://kallxo.com/3-zyrtare-te-drenasit-ne-mbajtje-nga-policia/