Gjykata Themelore e Prishtinës - Foto: KALLXO.com
Gjykimi për Vjedhjet në Depon e Makinave të Sekuestruara
Enver Krasniqit, ish-drejtorit të Agjencisë për Administrimin e Pasurisë së Sekuestruar iu lexua sot aktakuza nga prokurorja Dulina Hamiti, ndërsa pas këtij leximi, kryetari i trupit gjykues Arben Hoti, e pyeti të akuzuarin në lidhje me fajësinë a pafajësinë e tij.
Krasniqi, duke iu përgjigjur pyetjes së Hotit, tha se e ka kuptuar aktakuzën dhe ndihet plotësisht i pafajshëm në lidhje me akuzën për shpërdorim detyre.
Enver Krasniqi akuzohet nga Prokuroria në Prishtinë se si drejtor i Agjencisë për Administrimin e Pasurisë së Sekuestruar nuk e lajmëroi vjedhjen e një baterie të një makine që mbahej e sekuestruar në parkingun e depos së Llukarit.
Sipas aktakuzës, në këtë depo që është në administrim të Agjencisë për Administrimin e Pasurisë së Sekuestruar nga persona të panjohur ishte vjedhur bateria në veturën e markës “Lupo 3L”.
Në aktakuzë thuhet gjithashtu se Enver Krasniqi edhe pse ishte informuar nga administratori Fisnik Krasniqi për mungesën e një sasie të cigareve në depon e lartcekur, nuk kishte formuar komisionin për verifikimin e mallit.
Kryetari i trupit gjykues Arben Hoti, seancën e radhës për kundërshtimin e aktakuzës e caktoi më 19 janar 2017.