Donald Trump përballet me akuza të reja në hetimin e dokumenteve të klasifikuara
Ish-presidenti amerikan Donald Trump akuzohet se i ka bërë presion një punonjësi për t’i fshirë pamjet e sigurisë në pronën e tij në Florida në mënyrë që ta pengojë hetimin për çështjen e dokumenteve të klasifikuara.
Akuzat e reja lidhen me trajtimin e supozuar të Trump në raport ndaj dokumenteve qeveritare në Mar-a-Lago.
Trump tanimë veë është i akuzuar për mbajtje të qëllimshme të informacionit të mbrojtjes dhe dy për pengim.
Prokurorët thonë se pamjet tregojnë se dosjet e mbajtura ilegalisht po zhvendosen.
Anëtari i stafit të Mar-a-Lago, Carlos de Oliveira është gjithashtu i paditur. Ai dyshohet se ka pyetur se çfarë mund të bëhet për t’i fshirë pamjet.
Trump është deklaruar i pafajshëm së bashku me ndihmësin e tij të ngushtë Walt Nauta, i cili gjithashtu mori dy akuza shtesë për pengim të enjten.
Aktakuza e rishikuar përshkruan përpjekjet e supozuara midis Nauta dhe de Oliviera, menaxher i pronës në Mar-a-Lago, për ta penguar hetimin e departamentit të drejtësisë.
Sipas dokumenteve të reja të gjykatës, Nauta dhe de Oliveira komplotuan për t’i fshirë pamjet nga kamerat e sigurisë pasi Departamenti i Drejtësisë lëshoi një fletëthirrje ku kërkonte pamjet e vëzhgimit të bodrumit ku thoshte se mbaheshin dokumente konfidenciale.
Në dokumentet e gjykatës, de Oliveira pretendohet se i ka dërguar mesazhe një punonjësi tjetër që ishte drejtor i teknologjisë së informacionit se “shefi” kërkonte që serveri të fshihej.
Dokumentet pretendojnë se de Oliveira më vonë u takua me punonjësin në një dhomë të vogël të IT, i tha atij që biseda e tyre të mbetej private, më pas i bëri presion atij që ta përmbushte kërkesën e tij pasi punonjësi i tha de Oliveiras se ai nuk kishte autoritetin për ta bërë një gjë të tillë.
Aktakuza e përditësuar pretendon se Trump me vetëdije diskutoi një dokument top-sekret me biografët që vizituan Mar-a-Lago për ta intervistuar.
Aktakuza thotë se dokumenti të cilin Trump u zbuloi biografëve përmbante plane të mundshme për të sulmuar “Shtetin A”, të cilin CNN dhe media të tjera e identifikuan si Iran.
Çështja e dokumenteve të klasifikuara udhëhiqet nga prokurori special Jack Smith, i cili më herët gjatë ditës u takua me avokatët e zotit Trump mbi një hetim të veçantë mbi përpjekjet e supozuara për t’i përmbysur rezultatet e zgjedhjeve të vitit 2020.
Avokatët e zotit Trump, John Lauro dhe Todd Blanche takuan zyrtarë në zyrën e zotit Smith në Uashington DC, raportuan mediat amerikane.
Trump i hodhi poshtë akuzat e reja në rastin e dokumenteve në një deklaratë të dërguar me email nga fushata e tij presidenciale 2024.
Akuza e fundit kundër Trump shton një listë në rritje të problemeve ligjore për manjatin e pronave dhe realitetit televiziv.
Ai aktualisht pret gjykimin për çështje të parave të heshtura në të cilën ai përballet me 34 akuza për krime, pastaj përballet me akuza civile në një çështje shpifjeje kundër autores E Jean Carroll dhe prokurorët e shtetit të Gjeorgjisë janë ende duke e peshuar nëse do të ngrenë ose jo akuza ndaj Trump për një përpjekje të supozuar për t’i përmbysur rezultatet e zgjedhjeve atje./BBC
Përgatiti: Nuhi Shala
