Ministria e Infrastrukturës: Duhet ta zbatojmë kontratën për zgjatjen e pistës së Aeroportit
Përfaqësuesi i Ministrisë së Infrastrukturës në një debat mbi kontratën për zgjatjen e pistës së Aeroportit të Prishtinës kërkoi që të mos paragjykohet ligjshmëria e kontratës.
Duke komentuar analizën e Hekuran Muratit mbi këtë kontratë, Eset Berisha, këshilltar i lartë në MI, tha se nuk pajtohet me gjetjet sa i përket fajit për ministrin e tashëm të infrastrukturës Pal Lekaj.
“E përgëzoj për raportin që e ka bërë, e ka bërë një hulumtim të mirëfilltë. Nuk kisha mujt me u pajtu vetëm me të gjeturat e tij sa i përket fajit të Ministrisë së Infrastrukturës. Ministri Lekaj e ka marrë mandatin me 10 shtator të vitit të kaluar. Kur ne kemi ardhur në kabinet e kemi gjetur një kontratë të nënshkruar, nuk kemi pasur zgjidhje tjetër përveç të zbatojmë kontratën në përpikëri ashtu siç është nënshkruar”, tha Berisha.
Ai shtoi se në fazat e prokurimit të kësaj kontrate ka pasur mbikëqyrje.
“Nëse themi se një kontratë është e paligjshme pa u vërtetuar mirë atëherë vetëm po paragjykojmë’, tha ai.
Në debatin e organizuar mbi këtë çështje flitet edhe për kontrata tjera që përfunduan me dëme financiare për shtetin e Kosovës.
Pjesëmarrës në debat janë Hekuran Murati, analist financiar, Besnik Bislimi – VV, profesor në AUK, Eset Berisha – Ministria Infrastrukturës , Haki Abazi – Instituti i demokracive në zhvillim dhe Korab Sejdiu, Deputet.
Emisionin “Jeta në Kosovë”, mund ta ndiqni në linkun e mëposhtëm:
