Haradinaj kërkon ndihmë për reformën zgjedhore nga BE dhe OSBE

Kryeministri i së Kosovës, Ramush Haradinaj, gjatë takimit me shefin e OSBE-së në Kosovë, ambasadorin Jan Braathu dhe shefen e BE-së në Kosovë, Nataliya Apostolova, ka biseduar për proceset zhvillimore në vend, me theks reformën zgjedhore.

Sipas një komunikate për media, Haradinaj ka theksuar përkushtimin e Qeverisë së Kosovës për reformat e përgjithshme në vend, forcimin e sundimit të rendit dhe të ligjit, zhvillimin ekonomik, reforma këto të cilat do të jenë në shërbim të forcimit dhe rolit demokratik të institucioneve të vendit.

“Gjatë takimit, kryeministri Haradinaj ka falënderuar institucionet e Bashkimit Evropian për rolin e tyre dhe ndihmën që kanë dhënë dhe vazhdojnë të japin në procesin e reformave të përgjithshme në Kosovë, në të njëjtën kohë ka kërkuar mbështetjen e mëtejme për procesin e reformës zgjedhore, përmes së cilës do të garantohej një gjithëpërfshirje politike dhe përfaqësim adekuat gjinor dhe etnik”, është thënë në komunikatë.

Tutje thuhet se Haradinaj vlerësoi se Qeveria e Kosovës ka ndërmarrë të gjithë hapat e nevojshëm dhe është duke punuar me përkushtim në përmbushjen e Agjendës së Reformave Evropiane dhe përafrimin e legjislacionit me atë të BE-së.