Avokati Kundërshton Përgjigjet e BIK-ut për Ligjëratat e Shefqet Krasniqit

Teksa po lexohen provat në gjykimin e Shefqet Krasniqit, avokati i tij Sevdali Zejnullahu kundërshtoi dy përgjigje të Bashkësisë Islame për ligjëratat e Shefqet Krasniqit.

Në këto përgjigje, sipas aktakuzës, Bashkësia Islame kishte thënë se dy ligjëratat për të cilat u pyet nuk janë në frymën e interpretimeve parimore islame dhe nuk përputhen me mësimet, udhëzimet dhe parimet e kësaj feje.

Avokati Zejnullahu nuk e kundërshtoi përgjigjen e tretë të një komisioni të BIK-ut, pasi tha se ky komision ndonëse ka gjetur se ligjëratat nuk kanë qenë në përputhje me parimet e Bashkësisë Islame, ka konstatuar se nuk kanë përmbajtur elemente që nxisin gjuhën e urrejtjes ndaj ndonjë komuniteti identitar.

Në seancën e sotme munguan dy dëshmitaret e paarapara- Minire Heta dhe Nasere Ademi, por gjykata vendosi që të lexohen deklaratat e tyre të mëparshme.

http://kallxo.com/deshmitaret-mungojne-ne-gjykimin-e-shefqet-krasniqit/

Në seancën e kaluar një dëshmitar pretendoi se vëllai i i tij iu bashkua luftës në Siri, i nxitur nga ligjëratat e Shefqet Krasniqit.

Në seancën e zhvilluar më 14 dhjetor 2017, KALLXO.com raportoi se Shefqet Krasniqi ishte deklarua i pafajshëm për akuzat me të cilat ngarkohet.

Në aktakuzë konstatohet se shtytjen në kryerjen e veprave terroriste Krasniqi e ka kryer nga viti 2013 deri në 2014, ndërsa veprën penale të shmangies nga tatimit e ka kryer nga viti 2011 deri më 2016.

Gjithnjë sipas aktakuzës, Shefqet Krasniqi, në cilësinë e imamit të xhamisë se madhe “Mehmet Fatih” në Prishtinë, në vazhdimësi dhe me dashje ka shpërndarë mesazhe për publikun. Përmes paraqitjeve të tij të drejtpërdrejta para publikut përmes ligjëratave të ndryshme, si dhe duke shfrytëzuar rrjetet sociale dhe mjetet tjera të informimit, përmes gjuhës së vrazhdë dhe interpretimit të ajeteve kuranore jashtë kontekstit kohor dhe frymës parimore islame, ka shtyrë të tjerët ta marrin rrugën drejt zonës së konfliktit në Siri dhe Irak e më pas të kryejnë akte terroriste.  Sipas aktakuzës, Krasniqi ka cilësuar disa grupe fetare si armiq të myslimanëve-sunit, duke nxitur dhe përhapur urrejtje, përçarje dhe mosdurim ndaj grupeve tjera fetare, të cilat jetojnë edhe në Republikën e Kosovës.

Po ashtu, i pandehuri i lartcekur si tatimpagues dhe pronar i biznesit N.T “Portat”, ka fshehur dhe shmangur tatimin, me dashje ka dhënë të dhëna të pasakta, si dhe nuk i deklaruar të dhënat tjera relevante lidhur me obligimet tatimore, duke iu shmangur obligimeve tatimore në vlerë të përgjithshme prej  20,208.57 €.

Të gjitha këto pretendime të aktakuzës së Prokurorisë Speciale të Kosovës janë mohuar nga Krasniqi që është deklaruar i pafajshëm.

KALLXO.com në vazhdimësi ka raportuar për rrjedhën e hetimit ndaj Shefqet Krasniqit ndërsa raportimet mund t’i gjeni në këtë link.

Aktakuza është ngritur nga një prokuror vendës i Prokurorisë Speciale të Republikës së Kosovës, i cili i ka propozuar gjykatës që të pandehurin ta shpallë fajtor dhe ta dënojë sipas ligjit.