Arrest Shtëpiak për Faton Topallin
Gjyqtari i Procedurws Paraprake i ka caktuar maswn e arrestit shtëpiak deputetit të “Vetëvendosjes” Faton Topallit.
Caktimin e kësaj mase e konfirmoi për KALLXO.com avokati i Topallit Alban Ajvazi.
“Unë sapo e mora vendimin sipas të cilit deputetit Topalli i është caktuar masa e arrestit shtëpiak në afat prej 30 ditësh. Si do që të jetë ne edhe ndaj kësaj mase do të ushtrojmë ankesë,” tha avokati Ajvazi.
Përfundon Seanca Ndaj Faton Topallit-Pritet Vendimi
Përfundoi seanca për caktimin e masës së sigurisë ndaj deputetit të “Vetëvendosjes” Faton Topalli.
Përfundimin e seancës e bëri të ditur për KALLXO.com Alban Ajvazi, avokati i Faton Topallit.
Ajvazi tha se është duke pritur të njoftohet për vendimin e gjykatës.
Ai tregoi se në seancën e caktimit të masës së sigurisë, prokuroria ka kërkuar paraburgim për Topallin.
Ajvazi tha se e ka kundërshtuar këtë masë.
“E kam kundërshtu kërkesën për caktim të paraburgimit sepse e njëjta ka qenë e palogjikshme dhe e padrejtë, sepse klienti im nuk është aq naiv sa që të lajmërohet në organe shtetërore e të ketë rast në Kuvend po të ishte në arrati siç pretendon prokuroria, sepse nuk ka kurrfarë arsye të arratiset,” tha Ajvazi.
Faton Topalli Del Pasdite Para Gjykatës
Sot pritet të mbahet seanca për caktimin e masës së sigurisë ndaj deputetit të “Vetëvendosjes” Faton Topalli.
Lajmin e mbajtjes së kësaj seance e konfirmoi për KALLXO.com Alban Ajvazi, avokati i Faton Topallit.
Seanca ndaj Topallit pritet të nisë në orën 13:00. Avokati Ajvazi ende nuk e di se çfarë mase sigurie ka kërkuar për Topallin prokuroria, pasi nuk e ka marrë kërkesën për seancën e masës së sigurisë.
Faton Topalli u arrestua dje në Kuvendin e Kosovës. Ai dyshohet për aktivizimin e gazit lotsjellës në njërën nga mbledhjet e legjislativit.
Dje po nën dyshimet për aktivizim të lotsjellësit, u arrestua edhe Albulena Haxhiu, po ashtu deputete e “Vetëvendosjes”. Asaj gjatë ditës së djeshme iu caktua paraburgimi prej 30 ditësh.
Përveç Haxhiut, në paraburgim ndodhen edhe deputetët opozitarë Albin Kurti e Donika Kadaj-Bujupi, ndërsa në arrest shtëpiak po mbahen Haxhi Shala, Issmajl Kurteshi e Fisnik Ismaili.
