Zbulimi i ilaçeve të reja për kancerin e qafës së mitrës mund t’i rrisë normat e mbijetesës
Një kurs i shkurtër kimioterapie përpara trajtimit standard rrit shanset e mbijetesës, thotë zbulimi, raporton revista britanike prestigjioze The Times.
Shkencëtarët kanë bërë përparimin më të madh në trajtimin e kancerit të qafës së mitrës për dy dekada, i cili mund të shpëtojë jetën e qindra grave të reja.
Një provë ndërkombëtare e udhëhequr nga University College London zbuloi se përdorimi më i mirë i barnave ekzistuese e ul rrezikun e vdekjes së parakohshme nga sëmundja me 35 për qind. Kanceri i qafës së mitrës prek 3200 gra në vit në Mbretërinë e Bashkuar, kryesisht ato në të tridhjetat dhe vret 850 çdo vit.
Trajtimi standard që nga viti 1999 ka qenë një kurs i kemoradicionit (CRT), një kombinim i kimioterapisë dhe radioterapisë.
Megjithatë, testi që përfshin 500 pacientë zbuloi se përshkrimi i një kursi gjashtëjavor të kimioterapisë përpara fillimit të CRT i rrit ndjeshëm shanset e mbijetesës për ata me sëmundje.
Sipas Dr Mary McCormack e Institutit të Kancerit të UCL, e cila udhëhoqi provën, tha: “Sprova jonë tregon se ky kurs i shkurtër i kimioterapisë shtesë i ofruar menjëherë përpara CRT standarde mund ta zvogëlojë rrezikun e kthimit të kancerit ose vdekjes së parakohshme me 35 për qind”.
“Ky është përmirësimi më i madh i rezultatit të kësaj sëmundjeje në mbi 20 vjet. Unë jam jashtëzakonisht krenar për të gjithë pacientët që morën pjesë në provë; kontributi i tyre na ka lejuar t’i mbledhim provat e nevojshme për ta përmirësuar trajtimin e pacientëve me kancer të qafës së mitrës kudo. Ne nuk mund ta kishim bërë këtë pa mbështetjen bujare të Cancer Research UK”.
Prova dhjetëvjeçare, e quajtur Interlace, përfshiu gra me kancer të qafës së mitrës në spitalet në Mbretërinë e Bashkuar, Meksikë, Indi, Itali dhe Brazil, të cilat kishin një moshë mesatare 46 vjeç.
Pacientët u ndanë në mënyrë rastësore për të marrë ose CRT standarde, që përfshin rrezatim të jashtëm me ilaçe javore të kimioterapisë, ose një kurs fillestar kimioterapie gjashtë-javor i ndjekur nga i njëjti KRT standard.
Pas pesë vjetësh, 80 për qind e atyre që kishin marrë kimioterapi shtesë ishin gjallë, krahasuar me 72 për qind në grupin e trajtimit standard.
Për shkak se medikamentet e nevojshme për kimioterapinë – karboplatina dhe paclitaxel – janë të lira, të qassshme dhe tashmë të miratuara për përdorim te pacientët, autorët thonë se ato mund të përfshihen në kujdesin standard relativisht shpejt.
Sipas Profesorit Jonathan Ledermann, autor i vjetër i hulumtimit, “Kanceri i qafës së mitrës është një sëmundje që shpesh godet gratë në të tridhjetat ose më të reja. Ata me sëmundje të avancuar lokalisht kanë një shans relativisht të lartë të rikthimit dhe sëmundja mund të marrë një kosto të madhe për pacientët dhe familjet e tyre. Kjo i bën rezultatet e provës Interlace, e cila i përmirëson ndjeshëm [shanset] e përgjithshme të mbijetesës, një përparim të rëndësishëm në trajtim”.
Sipas Dr Iain Foulkes, drejtor ekzekutiv i kërkimit dhe inovacionit në Cancer Research UK, “Koha është gjithçka kur ju jeni duke trajtuar kancerin. Akti i thjeshtë i shtimit të kimioterapisë induksioni në fillimin e trajtimit të kemoradicionit për kancerin e qafës së mitrës ka dhënë rezultate të jashtëzakonshme në këtë provë.
“Një numër në rritje i provave po e tregon vlerën e raundeve shtesë të kimioterapisë përpara trajtimeve të tjera, të tilla si kirurgjia dhe radioterapia në disa kancere të tjera. Jo vetëm që mund t’i zvogëlojë shanset e rikthimit të kancerit, por mund të shpërndahet shpejt duke përdorur ilaçe tashmë të disponueshme në mbarë botën.
“Ne jemi të ngazëllyer për përmirësimet që ky test mund të sjellë në trajtimin e kancerit të qafës së mitrës dhe shpresojmë se kurset e shkurtra të kimioterapisë induksionale do të miratohen me shpejtësi në klinikë”.
Gjetjet, të prezantuara të dielën në Kongresin e Shoqatës Evropiane për Onkologjinë Mjekësore në Madrid, janë një hap i rëndësishëm përpara në çrrënjosjen e kancerit të qafës së mitrës si shkaktar i vdekjes tek gratë e reja.
Rastet e kancerit të qafës së mitrës kanë shënuar rënie me një të katërtën në Mbretërinë e Bashkuar që nga fillimi i viteve 1990, pjesërisht falë programit të depistimit të testit të qafës së mitrës.
Udhëheqësit e shëndetësisë shpresojnë se sëmundja mund të eliminohet në mënyrë efektive si rezultat i programit të vaksinimit HPV, i cili u lanaua nga NHS në vitin 2008 për vajzat e moshës 12 dhe 13 vjeç dhe pastaj është ka pasur shtrirje edhe tek djemtë në vitin 2019.
Virusi HPV shkakton 99 për qind të kancereve të qafës së mitrës pasi çon në zhvillimin e qelizave jonormale në qafën e mitrës, të cilat, nëse nuk trajtohen, mund të shndërrohen në kancer./The Times
Përgatiti: Nuhi Shala
