Emisioni i KALLXO.com paraqitet si provë në gjykimin rreth rrënimit të aneks objektit 'Abi Çarshia'
Gjykimi për rrënimin e aneks-objektit të ‘Abi Çarshisë’ të ndërtuar pa leje ka vazhduar me propozimin e provave të reja nga ana e mbrojtësve dhe të akuzuarve.
Avokati Blerim Mazreku, mbrojtës i të akuzuarit Islam Thaçi në shqyrtimin e sotëm përpara trupit gjykues propozoi rreth 70 prova të reja por edhe prova materiale lidhur me çështjen në fjalë.
Këto prova, për shkak të efikasitetit dhe ekonomizimit të procedurës i njëjti deklaroi se do t’i paraqesë me shkrim brenda afatit ligjor prej 7 ditësh.
Po ashtu, i akuzuari Islam Thaçi ish-kryeinspektor në Komunën e Prizrenit, mbështeti propozimin e mbrojtësit të tij, gjithashtu ai si provë gjykatës dhe palëve të tjera ia paraqiti CD-të e emisionit të realizuara nga “Kallxo.com”, në të cilat përfshihen deklarimet – pamjet filmike të zyrtarëve komunal si dhe përfaqësuesit të palës së dëmtuar”ABI-SHPK”, Irfan Fusha.
Në anën tjetër, për përfaqësuesin e prokurorisë Mehdi Sefa dhe për përfaqësuesin e palës së dëmtuar Taulant Hodaj këto pamje filmike nuk kishin ndonjë relevancë dhe i kundërshtuan provat e paraqitura.
“Në bazë të asaj që e kam parë në emisionin e “Kallxo.com” të realizuar disa vite më parë, konsideroj se nuk ka asnjë relevancë me veprimet që përfshihen në aktakuzë”- shtoi avokati Hodaj.
Tutje në gjykim, avokati Mazreku bëri kundërshtimin e secilës provë të propozuar nga ana e përfaqësuesit të palës së dëmtuar avokat Hodaj të bëra në seancën e kaluar, më datë 16 shtator 2021.
Mes tjerash ai i kundërshtoi provën lidhur me emailin e kryetarit Haskuka drejtuar kryeministrit Albin Kurti.
“Lidhur me emailin e pretenduar nga z. Mytaher Haskuka drejtuar kryeministrit Albin Kurti, e kundërshtojmë ngase ka të meta esenciale si dhe nuk ka hyrje në të cilën mund të verifikohet nëse emaili është dërguar nga z. Haskuka”- tha avokati Blerim Mazreku.
Nën këto rrethana, duke patur parasysh faktin se në gjykim janë prezantuar një mori të provave të reja, kryetarja e trupit gjykues Kymete Kicaj mori vendim që seanca e sotme të ndërprehet.
Lidhur me aprovimin apo kundërshtimin e provave do të vendoset në seancat e radhës me datë 24,25 dhe 26 dhjetor.
Sipas Prokurorisë, të akuzuarit Islam Thaçi, në cilësinë e drejtorit të Inspektoratit, Jetmire Verezi dhe Egzona Morina Thaqi, inspektore të ndërtimit, Arianit Taraku dhe Isë Bislimaj, zyrtarë në Drejtorinë e Inspektoratit, Shqipëron Krasniqi, përfaqësues ligjor në Komunën e Prizrenit, duke shfrytëzuar detyrën apo autoritetin zyrtar, kanë mundësuar realizmin e rrënimit të aneks-objektit të “Abi Çarshia” në Prizren, duke e pasur të ditur faktin se i dëmtuari veçse e kishte dorëzuar aplikacionin për legalizim të aneksit.
Rasti për të cilin akuzohen të pandehurit ka ndodhur më 19 dhe 21 korrik 2019.
Prokuroria pretendon se të njëjtit kanë vepruar në kundërshtim me Ligjin për trajtimin e ndërtimeve pa leje, Udhëzimin Administrativ nr.06/19, Ligjin mbi procedurën e përgjithshme administrative, si dhe vendimet e Ministrisë së Mjedisit dhe Planifikimit Hapësinor, nr. A-213/18 dhe A-179/19, me të cilat ishin anuluar aktvendimet e Drejtorisë së Inspektoratit Komunal të Ndërtimtarisë në Prizren.
Sipas Prokurorisë, këto vendime obligojnë organet komunale në Prizren të veprojnë konform Ligjit për trajtimin e ndërtimeve pa leje, si dhe udhëzimeve administrative në fuqi, andaj sipas aktakuzës, të akuzuarit duke mos i përfillur këto vendime, veprojnë në kundërshtim me ligjet në fuqi.
Dëmi që pretendohet se i është shkaktuar “Abi Çarshia”, me rrënimin e aneksit në fjalë, konsiderohet 69 mijë e729 euro.
Raportimet e KALLXO.com lidhur me këtë rast mund t`i lexoni duke klikuar në këtë link.
https://kallxo.com/tag/abi-carshia/